Шымкентте балмұздақтан уланғандардың саны 50-ге жетті

Шымкентте балмұздақтан уланған адамдардың саны 50-ге жетті, деп хабарлады "Хабар 24". Бұл туралы облыстық денсаулық сақтау басқармасының баспасөз қызметі мәлімдеді.

Телеарнаның хабарлауынша, қазіргі таңда қалалық жұқпалы аурулар ауруханасының жансақтау бөліміне түскен жүкті әйел мен екі жасөспірім жалпы бөлімге шығарылды.  

"Тәтті жеп жедел ішек инфекциясы ауруына шалдыққандардың қазіргі таңда жағдайы бірқалыпты", - дейді дәрігерлер.

Айта кетейік, бұл жайт әл-Фараби аудандық полиция бөлімінде сотқа дейінгі тергеудің бірыңғай тізіліміне "санитарлық қағидаларды немесе гигиеналық нормативтерді бұзу" бойынша тіркелді. Сараптама тағайындалды. Құқық қорғау органының қызметкерлері оқиғаның мән-жайын анықтап жатыр.

Еске сала кетейік, бұған дейін Шымкентте балмұздақтан уланғандар санының 39-ға жеткені хабарланған болатын.