Түркістан облысында полицейлердің жүргізушіні қуған сәті видеоға түсіп қалды

Түркістан облысында Lexus көлігін қуған полицейлер видеоға түсіп қалды, - деп хабарлайды Tengrinews.kz тілшісі.

Полицейлер мәліметінше, оқиға 12 қарашада Сайрам ауданында болған. Әлеуметтік желідегі кадрларда тәртіп сақшылары талабына бағынбай, қашпақ болған жүргізушінің қызметтік көлікпен соқтығысқанын көруге болады.

Назар аударыңыз, видеода былапыт сөздер айтылады!

"Жол апатынан ешкім зардап шеккен жоқ, көліктерге материалдық залал келді. Бұл дерек Сайрам аудандық полиция бөлімінде тіркелді. Сараптама тағайындалды. Қорытындыға сәйкес, Lexus жүргізушісі көлікті мас күйінде басқарған", - деді Түркістан облысының Полиция департаменті өкілдері.

Құқықбұзушыға қатысты үш әкімшілік хаттама толтырылды – төтенше жағдай туғызғаны, көлікті мас күйінде басқарғаны және полиция қызметкерлерінің талаптарын орындамағаны үшін.

Құқық қорғау органдары іс материалдарын сотқа жолдады.

Сілтемесіз жаңалық оқисыз ба? Онда Telegram желісінде парақшамызға тіркеліңіз!