Жамбыл облысында жазғы лагерь ретінде ашылған мекемеде діни дәрістер жүргізілген

Жамбыл облысында балаларға арналған жазғы лагерь атын жамылған ұйым кәмелетке толмағандарды дінге тартқан, - деп хабарлайды Тengrinews.kz тілшісі Жамбыл облысы прокуратурасының баспасөз қызметі. 

Жамбыл облысының прокуратурасында облыстық діни бірлестіктер жетекшілері мен жергілікті атқарушы органдардың кездесуі өтті. Кездесу кезінде дін саласындағы өзекті мәселелер талқыланды. 

Жиналғандарға осы саладағы заң бұзу деректері мысалға келтірілді. 

"Мәселен, Қордай ауданында жазғы лагерь атымен ашылған мекемеде кәмелетке толмаған 50-ден аса балаға діни дәрістер өткізілген. Мекеме басшылығының мұндайға рұқсаты және тиісті біліктілік талаптарына да сай болмаған", - дейді прокуратура өкілдері. 

Бұл дерекке қатысты мекеме басшысы әкімшілік жауапкершілікке тартылып, мұндай қызметті ары қарай жалғастыруға тыйым салынды.