Неймар "Барселонадан" кететін болды - БАҚ

Бразилиялық Esporte Interativo басылымның жазуынша, Неймар франциялық "Пари Сен-Жермен" клубына өтуге келісім берген. Сонымен бірге, басылым ойыншының Париж клубының формасындағы суретін фотошоп арқылы жасап та қойған, - деп хабарлайды Eurosport.

Басылымының жазуы бойынша, Неймар "Барселонада" Мессидің көлеңкесінде жүргендіктен ауысуға келіскен-мыс. Неймардың ауысатыны туралы қауесетті бразилиялық тағы бір басылым - Lance ары қарай жалғастырып, мұндай шешімге "ПСЖ" клубының ойыншысы Дани Альвес себеп болғанын жазған. 

Мұның алдында Ди Марцио ПСЖ клубы Неймар үшін 222 миллион еуро төлеуге дайын екенін мәлімдеген. Алайда "Барселонаның" вице-президенті Жорди Местре бразилиялық форвардтың париждік клубқа ауысатыны туралы ақпаратты жоққа шығарды.