Қазақстан командалары қатысатын Еурокубок ойындары қай арналардан тікелей таратылады

Шымкенттік "Ордабасы" мен иерусалимдік "Бейтар" және "Астана" мен Словенияның "Марибор" клубтары арасындағы ойындарды "Қазақстан" және "Кazsport" телеарналары тікелей эфирде көрсетеді, - деп хабарлайды Tengrinews.kz тілшісі "Қазақстан" ТРК баспасөз қызметіне сілтеме жасап.

Баспасөз қызметінің мәліметінше, "Ордабасы" мен "Бейтар" арасындағы кездесу 9 шілдеде Иерусалимде өтеді. "Кazsport" телеарнасы Астана уақыты бойынша 22.50-де ойынды тікелей эфирде көрсетеді, ал 10 шілде күні осы телеарнада сағат 10.00 және 22.00-де ойынның қайталауы болады. Айта кетейік, бұл қарсыластар арасындағы екінші матч болмақ. 2 шілде күні құрамалар Шымкентте өзара кездесу өткізген болатын. Матч 0:0 есебімен аяқталды.

14 шілдеде сағат 00.30-да "Қазақстан" ұлттық телеарнасы елордалық "Астана" мен Словенияның "Марибор" футбол клубтары арасында өтетін кездесуді тікелей эфирде көрсетсе, 15 шілдеде "Кazsport" телеарнасы сағат 10.00 және 22.00-де тікелей эфирде көре алмаған жанкүйерлер үшін ойынның қайталауын ұйымдастырады.