Қазақша
Русский
Алматы тұрғыны шетелде көз түсін өзгертуге арналған ота жасатқаннан кейін жанарынан айырылып қала жаздады. Процедура ауыр асқынуларға әкеліп соққан. Пациенттің бір көзі мүлдем көрмей қалса, екіншісі тек жарықты ғана ажыратқан, - деп хабарлайды TengriHealth тілшісі Денсаулық сақтау министрлігі мәліметіне сілтеме жасап.
Сұлулыққа ұмтылыс мүгедектікке әкелді
Алматылық көз түсін өзгерту үшін шетелдік емханаға жүгінген. Алайда отадан кейінгі асқынулар салдарынан ол көру қабілетінен толықтай дерлік айырылды. Оған глаукома және мөлдір қабықтың бұлдырауы диагнозы қойылды. Осының салдарынан емделушіге бірінші топтағы мүгедектік берілген.
Оның айтуынша, көптеген дәрігер бұл жағдайға араласуға қорыққан. Күрделі жағдайды Алматы қалалық орталық клиникалық ауруханасының офтальмолог дәрігері Гүлзат Әбдірайымова өз мойнына алды.
"Оның күрделі операцияларды жасайтынын естіген соң, дәл осы дәрігерге жүгінуді жөн көрдім".
Дәрігерлердің айтуынша, жағдайды көз ішіндегі қысымның өте жоғары болуы қиындатқан. Ота кезінде көру қабілетін біржола жоғалтуға әкеп соғатын экспульсивті қан кету түріндегі ауыр асқыну қаупі болды.
Дәрігерлер тәуекелге бел буды
Жоғары қауіпке қарамастан, мамандар жарықты сезу қабілеті сақталған көз үшін күресуге шешім қабылдады.
Науқасқа кешенді ота жасалды. Екі сағатқа жуық уақытқа созылған күрделі аралас операция барысында көзішілік қысымды төмендетуге бағытталған антиглаукомалық операция және мөлдір қабықты трансплантаттау жүргізілді.
Хирургиялық араласудан кейін науқастың көзі көре бастады. Бүгінде әйел бақылаудан өтіп, оңалту шараларын жалғастырып жатыр.
Дәрігерлердің айтуынша, мөлдір қабықты трансплантаттау – офтальмологиядағы ең күрделі операциялардың бірі. Алматы қалалық орталық клиникалық ауруханасында мұндай жоғары технологиялық операциялар донорлық бағдарлама шеңберінде жүргізіледі. Жыл басынан бері мамандар 12 мөлдір қабықты трансплантаттау жасап, көптеген пациентке көру қабілетін сақтап қалуға және қайта қалпына келтіруге мүмкіндік берді.
+7 (777) 001 44 99
