Денсаулық сақтау жүйесінің сапасы бойынша елдер рейтингінде Қазақстан нешінші орында

Фото:depositphotos.com

Қазақстан 2026 жылдың бірінші жартыжылдығы қорытындысы бойынша Numbeo денсаулық сақтау деңгейі рейтингінде әлемнің 100 елі арасында 60-орынға үшінші жыл қатарынан тұрақтап тұр, - деп хабарлайды TengriHealth.

Рейтинг нені көрсетеді?

Health Care Index - бұл әртүрлі елдер мен қала тұрғындарының денсаулық сақтау жүйесінің сапасына берген бағасын көрсететін халықаралық көрсеткіш. Яғни, индекс ресми медициналық немесе мемлекеттік статистика негізінде емес, краудсорсинг әдісімен - пайдаланушылардың пікірлері мен бағалаулары негізінде қалыптасады.

Есептеу кезінде бірнеше фактор ескеріледі:

медициналық қызмет көрсету сапасы;
дәрігерлер мен медициналық персоналдың кәсібилігі;
медициналық мекемелердің жабдықталуы;
медициналық көмек алу жылдамдығы;
емдеудің қолжетімділігі;
медициналық қызметтердің құны;
пациенттердің денсаулық сақтау жүйесіне көңілі толуы.

Көрсеткіш неғұрлым жоғары болса, тұрғындар денсаулық сақтау жүйесінің жұмысын соғұрлым жақсы бағалайды.

Қолданылатын шкалаға сәйкес:

80-нен 100 балға дейін - денсаулық сақтаудың өте жоғары деңгейі;
70-тен 80 балға дейін - жоғары;
60-тан 70 балға дейін - жақсы;
50-ден 60 балға дейін - орташа;
50 балдан төмен - төмен.

Numbeo мәліметтері бойынша, 2026 жылдың бірінші жартыжылдығында Қазақстан Health Care Index көрсеткіші бойынша 60,7 балл жинап, 100 елдің ішінде 60-орынға тұрақтады.

Осылайша, еліміз денсаулық сақтау деңгейі жақсы мемлекеттер санатына жатады.

ЕАЭО елдері арасындағы Қазақстанның жағдайы

Еуразиялық экономикалық одақ елдері арасында Қазақстан Ресейден кейінгі екінші орында тұр.

ЕАЭО елдерінің рейтингтегі орындары келесідей бөлінді:

Ресей - 57-орын, индекс 61,6;
Қазақстан - 60-орын, индекс 60,7;
Армения - 61-орын, индекс 59,5;
Беларусь - 90-орын, индекс 49,6.

Қазақстанның позициясы қалай өзгерді?

Қазақстан 2024 жылдан бері рейтингте 60-орынды сақтап келеді.

2023 жылы еліміз 94 мемлекеттің ішінде 58-орында болған. Ол кезде денсаулық сақтау индексі 59,9 балл болған еді.

Ұқсас көрсеткіштер алдыңғы жылдары да тіркелген:

2022 жылы - 95 елдің ішінде 58-орын, индекс 60,0;
2021 жылы - 93 елдің ішінде 58-орын, индекс 60,1.

Соңғы 14 жылдағы ең төмен нәтижені Қазақстан коронавирус пандемиясы өршіп тұрған кезде көрсетті. 2020 жылы еліміз 93 мемлекеттің ішінде 86-орынға түсіп, индекс 50,7 балл болды.

Қарастырылып отырған бүкіл кезеңдегі ең үздік нәтиже 2014 жылы тіркелді. Ол кезде Қазақстан 82 елдің арасында 48-орынға ие болып, 62,2 балл жинаған еді.

Көшбасшылар қатарына кімдер енді?

Рейтингте 87,1 балл көрсеткішімен Тайвань бірінші орынды иеленді.

Сондай-ақ үздік үштікке мына елдер кірді:

Оңтүстік Корея - 82,9 балл;
Нидерланды - 81,5 балл.

Ең төмен көрсеткіштер мына елдерде тіркелді:

Бангладеш - 42,0 балл;
Венесуэла - 39,9 балл;
Сирия - 35,4 балл.

Бұған дейін Қазақстанда медициналық көмекке жүгінбей, өз бетінше емделетін азаматтардың үлесі артқаны туралы жазған болатынбыз. Себептердің қатарында олар емханалардағы кезек пен "жазылып кетеді" деген сенімді атайды.

Денсаулық Қазақстан Рейтинг

Денсаулық сақтау деңгейі бойынша жаңа әлемдік рейтинг жарияланды: Қазақстан нешінші орында?

Рейтинг нені көрсетеді?

ЕАЭО елдері арасындағы Қазақстанның жағдайы

Қазақстанның позициясы қалай өзгерді?

Көшбасшылар қатарына кімдер енді?