Денсаулық сақтау министрлігі Қазақстандағы референс-орталықтардың жұмыс ережелерін әзірледі

Фото:depositphotos.com

Денсаулық сақтау министрлігі қандай медициналық ұйымдар референс-орталық бола алатынын айқындады - олар дәрігерлерге емдеу тактикасын таңдауға көмектеседі және күрделі клиникалық диагноздарды қайта тексереді. Тиісті бұйрық жобасы "Ашық НҚА" порталда жарияланды, - деп хабарлайды TengriHealth.

Референс-орталықтар немен айналысады?

Құжатқа сәйкес, мемлекеттік медициналық мекемелердің немесе квазимемлекеттік сектор ұйымдарының құрылымдық бөлімшелері референс-орталық мәртебесін ала алады.

Олар келесі талаптарға сай болуы тиіс:

денсаулық сақтау саласындағы ғылыми ұйым мәртебесінің болуы;
үшінші деңгейден төмен емес мамандандырылған, жоғары технологиялық медициналық көмек көрсету;
заманауи жабдықтардың, білікті мамандардың болуы және сапа менеджменті жүйесінің енгізілуі.

Анықтама. Қазақстанның денсаулық сақтау жүйесінде көмек көрсетудің үш деңгейі бар: Алғашқы деңгей - емханалар, учаскелік дәрігерлер, жалпы тәжірибелік дәрігерлер. Екінші деңгей - көп таралған аурулар бойынша мамандандырылған көмек көрсететін аудандық және қалалық ауруханалар. Үшінші деңгей - ең күрделі жағдайлар емделетін, жоғары технологиялық оталар жасалатын және тар бейінді мамандар жұмыс істейтін республикалық, ұлттық және ірі облыстық орталықтар.

Денсаулық сақтау министрлігі референс-орталықтар дәрігерлерге емдеу тактикасын таңдауға көмектеседі және күрделі клиникалық диагноздарды қайта тексереді деп жоспарлап отыр.

"Референс-орталықтар аурулардың жекелеген бейіндері мен медициналық қызметтер бойынша жетекші сараптамалық алаңдарға айналады", - делінген құжатта.

Орталықтардың негізгі міндеті медициналық ұйымдарға сараптамалық және әдістемелік қолдау көрсету болмақ. Олар келесі жұмыстарды атқарады:

диагностика мен емдеудің бірыңғай стандарттарын енгізеді;
бейінді медициналық ұйымдардың жұмысын үйлестіреді;
мамандандырылған медициналық көмек сапасына мониторинг жүргізеді;
патологиялық-анатомиялық диагностиканың сапасы мен қауіпсіздігін бағалайды.

Бұл пациенттер үшін несімен маңызды?

Министрлік жаңа жүйе диагностика дәлдігін, зерттеу нәтижелерінің шынайылығын арттырып, күрделі жағдайларда қосымша сараптамалық бағалау деңгейін қамтамасыз етуі тиіс деп атап өтті.

"Түптеп келгенде, референс-орталықтар институтын енгізу пациенттің тұрғылықты аймағына қарамастан, мамандандырылған медициналық көмектің сапасын арттыруға ықпал етеді", - делінген хабарламада.

Бұл ретте пациенттер үшін ештеңе өзгермейді. Оларға референс-орталықтарға өз бетінше жүгінудің немесе қосымша процедуралардан өтудің қажеті болмайды.

"Референс-орталықтар медициналық ұйымдармен тікелей байланыс орнатып, оларға сараптамалық қолдау көрсететін болады".

Бұған дейін Мәжіліс депутаты Асхат Аймағамбетов жетекші медициналық мекемелер, соның ішінде ұлттық онкологиялық орталықтар келесідей зерттеулерді қайта тексере алатынын айтқан болатын:

иммуногистохимиялық талдаулар,
молекулалық-генетикалық тесттер,
патологиялық-анатомиялық материалдар.

Денсаулық диагноз тексеріс Денсаулық сақтау министрлігі

Күрделі диагноздар қайта тексеріледі: Денсаулық сақтау министрлігі жаңа жүйені іске қоспақ

Референс-орталықтар немен айналысады?

Бұл пациенттер үшін несімен маңызды?