1 миллион доллар залал: Германия Қазақстанға алаяқтық жасады деген күдіктіні берді

Германиядан Қазақстанға аса ірі көлемде алаяқтық жасады деген күдікті экстрадицияланды. Ер адам 10 жылдан аса уақыт бойы іздеуде болған, - деп хабарлайды Tengrinews.kz Бас прокуратураға сілтеме жасап.

Бас прокуратура мен ІІМ Интерпол қызметкерлері, Қазақстанның Германиядағы елшілігінің қолдауымен қылмыстық жауаптылыққа тарту мақсатында шетелдік азаматты экстрадициялады.

"Тергеу барысында, күдікті 2014 жылы адамдар тобының алдын ала сөз байласуымен, компьютерлік техниканы жеткізуге жәрдем көрсету сылтауымен қазақстандық кәсіпкердің 1 миллион АҚШ доллары көлеміндегі қаражатын алдау арқылы иемденгені анықталды", - делінген хабарламада.

Қылмыс жасағаннан кейін күдікті жасырынып, оған халықаралық іздеу жарияланған.

2025 жылдың қыркүйегінде ол Германияда ұсталып, Бас прокуратураның сұрауы бойынша Қазақстанға жеткізілді. Қазіргі уақытта сотталушы тергеу изоляторына қамалған.

Айыпталған қылмысты жасағаны үшін мүлкі тәркіленіп, 10 жылға дейін мерзімге бас бостандығынан айыру жазасы қарастырылған.