6 жыл бұрын жоғалып кеткен астаналық аман-есен табылды

Ақмола облысындағы ауылдардың бірінен алты жыл бұрын жоғалып кеткен Астана тұрғыны аман-есен табылды, - деп хабарлайды Tengrinews.kz тілшісі.

Ақмола облысы ПД мәліметінше, Қорғалжын аудандық полиция бөлімінің учаскелік полиция инспекторы Шалқар ауылында жедел-іздестіру іс-шараларын жүргізу кезінде елорданың хабар-ошарсыз кеткен 40 жастағы тұрғынының орналасқан жерін анықтаған.

"2018 жылдың 8 шілдесінде Астана полициясына ер адамның әпкесі өтініш білдірген.

Әйел ағасының үйден кетіп, қайта оралмағанын хабарлады. Жоғалған адамды іздеуге тек елордалық полиция қызметкерлері ғана емес, сонымен қатар облыс полициялары да назар аударды. Жоғалған адам бүкіл елордалық аймақта және басқа облыстарда іздестірілді. Ұзақ іздеуден кейін оған мемлекетаралық іздеу жарияланған", - делінген хабарламада.

Қабылданған шаралар нәтижесінде ер адам бірнеше ай бұрын келген Қорғалжын ауданы аумағындағы жеке үйлердің бірінен табылды.

Қазіргі уақытта мұндай ұзақ уақыт болмаудың себептері анықталып жатыр.

Сілтемесіз жаңалық оқисыз ба? Онда Telegram желісінде парақшамызға тіркеліңіз!