Adal партиясы Amanat-қа қосылады

Adal саяси партиясы басқарушы Amanat-қа қосылуға шешім шығарды, - деп хабарлайды Tengrinews.kz тілшісі.

Партияның әлеуметтік желілердегі мәлімдемесінде Adal мүшелеріне Президент Қасым-Жомарт Тоқаевтың жұмыс стилі ұнайтыны жазылған.

"Ол қазір әділетті мемлекет құруды көздеп отыр. Мемлекет басшысының бүгінгі Қазақстан халқына Жолдауы аясында айтқан саяси реформалары соның тағы бір дәлелі. Бірақ бұл айтылған реформалар қалай жүзеге асырылады? Мәселе осында. Ол үшін бүкіл қазақ қоғамы бірігуі қажет. Президент реформаларының жергілікте жерде тиісті деңгейде іске асырылмай қалу қауіпі жоғары. Қасым-Жомарт Кемелұлы айтқан "Достарға - бәрін, қалғанына заң бойынша" деген қағидамен келген қоғамның өткенін ұмытпауымыз керек.

Сол үшін біз, адалдықтар Жаңа Қазақстанды құруға белсенді қатысып, еліміздегі оң өзгеріске үлес қосқымыз келеді.

Партияластарымызбен ақылдаса келе, бүгін Adal-дың Саяси кеңесінде президенттік Amanat партиясына қосылу туралы бірауыздан шешім қабылдадық", - делінген жазбада.

Айта кетейік, Adal басшысы - Серік Сұлтанғали.

Сілтемесіз жаңалық оқисыз ба? Онда Telegram желісінде парақшамызға тіркеліңіз!