Ақмола облысында бір түнде бірнеше құрғақ шөп өрті сөндірілді

Целиноград ауданында, Ақжар ауылының маңында 12 гектар аумақта құрғақ шөп жанды.

"Құтқарушылардың жедел әрі үйлесімді іс-қимылының арқасында өрт толығымен сөндірілді. Өртті сөндіруге ТЖД күштері, "Жасыл аймақ" ОШШ қызметкерлері, жергілікті атқарушы органдар мен "Қазавиаорманқорғау" РМК өкілдері жұмылдырылды", - деп хабарлады ТЖМ.

Құрбандар мен зардап шеккендер жоқ.

Түнде құтқарушылар тағы екі жерде құрғақ шөптің тұтануын жойды.

Бурабай ауданының Ақылбай ауылында 0,05 гектар аумақта, ал Ерейментау ауданының Ақмырза ауылдық округінде 20 гектар аумақта құрғақ шөп жанды.

"Құтқарушылардың үйлесімді іс-қимылының арқасында қос өрт те жедел сөндірілді. Құрбандар мен зардап шеккендер жоқ", - деп хабарлады ТЖМ.

Айта кетейік, кейінгі күндері синоптиктер ескерту жасады. Олардың мәліметінше, Қазақстанның бүкіл аумағында дерлік орнаған ыстыққа байланысты өрт қаупі жоғары.