Алатауға дейінгі желі: Алматыда метроны дамытудың егжей-тегжейі айтылды

Алматыда қаланың 2040 жылға дейінгі Бас жоспарын түзетудің стратегиялық экологиялық бағалауы бойынша қоғамдық тыңдау өтіп жатыр. Шара барысында "Алматыбасжоспар" басшысы Асхат Садуов Алматы метрополитені құрылысының егжей-тегжейін айтып берді, деп хабарлайды Tengrinews.kz тілшісі.

"Сайран" бекеті Алатаумен байланыстырылады

Алматыда 2040 жылға дейінгі Бас жоспар жобасы бойынша қоғамдық тыңдау өтті. "Алматыбасжоспар" ҒЗИ" ЖШС басшысы Асхат Садуов жоба Экология министрлігінен оң қорытынды алғанын хабарлады. Оның айтуынша, жоба мегаполисті көпорталықты және жинақы дамытуға бағытталған, бұл жолдағы жүктемені едәуір азайтуға мүмкіндік береді.

Журналистердің сұрақтарына жауап бере отырып, Садуов қаладағы барлық зиянды шығарындының 60 пайызы көлікке тиесілі екенін атап өтті. Оның пікірінше, бұл мәселені шешуге жүрдек қоғамдық көлікті дамыту ықпал етуі тиіс.

Бұл ретте қала билігі желтоқсандағы талқылаудан кейін көлік схемасына өзгеріс енгізді.

"Бұл SkyTrain-ге қатысты болды. Көліктің жаңа түрі пайда болды. Бағыты аздап өзгерді. Шамалы ғана. Тұтастай алғанда, қаңқа сол күйінде қалды", – деп нақтылады Садуов.

Мәселен, Райымбек даңғылы бойында BRT желісін іске қосудың орнына SkyTrain қарастырылып жатыр. "Алматыбасжоспар" басшысының айтуынша, бұл жобаны іске асыруға жол инфрақұрылымын дамыту басқармасы жауапты. Бұл ретте Алматыда метроны дамыту жоспары өзгеріссіз қалады.

"Біз депо бойынша келіссөз жүргіздік, Алматы әуежайынан рұқсат алдық. Метроның екінші желісі әуежайға дейін барады. Сонымен қатар тағы бір желі - "Сайран" бекетінен Алатауға, дәлірек айтқанда Gate ауданына дейін жетеді. Мұның бәрі көлік жүктемесін азайту үшін жасалып жатыр", – деді Асхат Садуов талқылау кулуарында.

Ведомство басшысы жүрдек желілерді іске қосу Қаскелең, Құлжа және Талғар бағыттарынан келетін күнделікті миграциялық ағынды тиімді реттеуге және азайтуға көмектесетінін, осылайша адамдардың Алматы орталығына жеке көлікпен кірмеуіне жағдай жасалатынын айтты.

Қала әкімдігінің мәліметінше, 2040 жылға қарай метро ұзындығы төрт еседен аса артып, 50,6 шақырымға жетуі тиіс. Қазіргі уақытта "Қалқаман" бекетінің құрылысы жалғасып жатыр, сондай-ақ "Барлық" көлік-ауысып міну торабына дейінгі тағы үш бекет құрылысына дайындық жүріп жатыр.

Алматыдағы метроның жаңа желілері

Алматының 2040 жылға дейінгі бұған дейін жарияланған Бас жоспар жобасына сәйкес, қала метросын айтарлықтай кеңейту көзделіп отыр. Билік мегаполистің әртүрлі бөлігін байланыстыратын үш желіден тұратын толыққанды желі құруды жоспарлап отыр.

Бірінші желі (қызыл): вокзалдан базарға дейін

Қазіргі уақытта метроның бірінші желісі "Бауыржан Момышұлынан" "Райымбек батырға" дейінгі жалпы ұзындығы 14,3 шақырым болатын 11 бекеттен тұрады.

Болашақта ол екі бағытта да ұзартылады:

• Батысқа қарай: салынып жатқан "Қалқаман" бекетінен (оны 2026 жылдың аяғына дейін іске қосуға уәде беріліп отыр) "Барлық" базарына дейін (5,3 шақырым) тағы үш бекет салынады. Ол жерде ауысып міну торабын салу жоспарланған.
• Солтүстікке қарай: "Райымбек батыр" бекетінен бастап желі Алматы-1 вокзалына дейін тартылады. Бұл тағы бес бекет (7,7 шақырым) қосады.

Нәтижесінде бірінші желідегі бекеттер саны 20-ға дейін артып, ұзындығы 29,2 шақырымға жуықтайды деп күтіледі.

Алматы метросы болашақ желілерінің схемасы / Фото қаланың Бас жоспары таныстырылымында түсірілген / 2025 жылғы желтоқсан

Екінші желі (көгілдір): қала арқылы айналым және әуежайға баратын жол

Екінші желі Алматы метро жүйесіндегі ең ауқымдысы болуы мүмкін. Жоба бойынша оның ұзындығы шамамен 76,6 шақырым болып, бекеттер саны 42-ге жетеді. Бас жоспар жобасына сәйкес, желі айналым құрылымына ие болады және қаланың негізгі көптеген ауданын қамтиды.

• Бағыты: желі мегаполистің батыс және шығыс бөліктерін қосады деп жоспарланып отыр: "Барлық" базары ауданынан бастап желі ірі магистральдар бойымен өтіп, кейін солтүстікке қарай Алматы-1 вокзалына, одан әрі Алматы халықаралық әуежайына қарай бағытталады. Айналымның оңтүстік бөлігі әл-Фараби даңғылы мен Тимирязев көшесі бойындағы тұрғын аудандарды қамтиды.
• Бірінші кезең: қазіргі "Жібек жолы" бекетінен әуежайға дейін. Ұзындығы шамамен 14 шақырым болатын бұл учаскеде сегіз бекет орналастыру жоспарланып отыр.

2025 жылдың желтоқсанында "Алматыбасжоспар" ҒЗИ бас директоры Асхат Садуов жобаның техникалық-экономикалық негіздемесі дайын екенін хабарлаған болатын. Ол мамандар жерасты инфрақұрылымы авиациялық жабдықтар жұмысына кедергі келтірмес үшін метро шығаберістерінің орналасуын әуежай әкімшілігімен келісіп жатқанын атап өткен еді.

Қазір бұл кезең аяқталды. Садуовтың 30 маусымдағы мәліметінше, әуежайдан тиісті рұқсат алынған.

Алматы метросы болашақ желілерінің схемасы / Фото қаланың Бас жоспары таныстырылымында түсірілген / Желтоқсан, 2025 жыл

Үшінші желі (жасыл): Алатауға дейін

Жаңа тармақ қаланың оңтүстік аудандарын солтүстікпен байланыстырады деп күтіледі.

• Бағыты: желі "Қазақфильм" ауданынан басталып, "Сайран" бекеті арқылы өтіп, солтүстікке – салынып жатқан Алатау қаласына қарай бағытталады.
• Ауқымы: желінің жалпы ұзындығы 28 шақырым болады, 17 бекет салу жоспарланған.

Жарияланған жоспарға сәйкес, 17 бекеттің екеуі Алатау аумағында орналасады.

Алматы метросы қанша жолаушы тасымалдады?

Бас жоспар құжаттарына сәйкес, метро іске қосылған сәттен бастап 83 миллионнан астам жолаушы тасымалдаған. Ұсынылған мәліметтер бойынша, оның үлесіне қоғамдық көлікпен тасымалдаудың 8,2 пайызы тиесілі, ал жолаушылар ағыны жыл сайын шамамен 10 пайыз артып келеді.

Тағы оқыңыз: Алматы метросын Алатау қаласымен байланыстыру: мән-жайы

Райымбек даңғылынан әл-Фарабиге дейін: Алматыда қоғамдық көліктің жаңа түрі іске қосылмақ