Алдағы күндері ауа райы қандай болады?

Синоптиктер 20-22 ақпанға арналған ауа райы болжамын жария етті, - деп хабарлайды Tengrinews.kz тілшісі "Қазгидромет" РМК өкілдеріне сілтеме жасап.

Синоптиктердің мәліметінше, алдағы күндері еліміздің басым бөлігінде әлі де қар жауады.

"Атлантикалық циклонмен байланысты жылы атмосфералық фронттар Қазақстанның солтүстік жартысы арқылы өтіп, барлық жерде қардың жаууын және боран, сондай-ақ ауа температурасының айтарлықтай жоғарылауын тудырды. Түнгі ауа температурасы 0...минус 5 градусқа дейін көтерілді. Алдағы тәулікте фронттардың әсері әлі сақталады, содан кейін олар Батыс Сібірдің оңтүстігіне кетеді. Қазақстан аумағының басым бөлігі жоғары атмосфералық қысым аясында болады", - дейді "Қазгидромет" РМК өкілдері.