Алматы облысында пранк-акция өтті

Биыл ҚР Қарулы Күштеріне 25 жыл толуына орай Алматы облысының өңірлік коммуникациялар қызметі осы айтулы шараға орай облыс орталығында "Ел қорғайтын сарбаз бол!" атты пранк-акция ұйымдастырды, - деп хабарлайды Tengrinews.kz тілшісі Алматы облысының өңірлік коммуникациялар қызметіне сілтеме жасап.

Яғни, қаннен-қаперсіз өз алдына кетіп бара жатқан жастарға тосыннан микрофон ұсынылып, оларға әскер, Отанды қорғау, патриотизм тақырыбында сауалдар қойылды. "Әскер қатарына баруға дайын емеспін әзір", - деген жауап алынса, оны аяқастынан пайда бола кететін екі әскери қызметкер еркінен тыс жетектеп ала жөнеледі.

Акция барысында жігіттерге әскери мамандар тарапынан әскердің мән-маңызы, талап-міндеті егжей-тегжейлі түсіндіріліп, оған қосымша ақпараттық буклеттер ұсынылды. Бұл акцияның ерекшелігі сонда, ондағы осы іс-әрекеттер түгел жасырын камерамен түсіріліп тұрды. Демек, барлық іс-әрекет шынайы болды деген сөз.

"Көктемгі әскер қатарына шақыру науқаны басталғаны баршамызға аян. Еліміздің ертеңі саналатын бозбалалар Отан қорғауға дайын ба, ынтасы қай деңгейде? Қуанышқа орай, пранк-акция кейіпкері болған 30-ға жуық жігіттің бәрі әскери борышын өтеуден еш қашпайтындықтарын, туған жерге деген сүйіспеншіліктерін, елдің амандығын, шекараның бүтіндігін қалайтындықтарын білдіріп жатты", - дейді пранк-акция жобасының авторы Ерасыл Толымбекұлы.

Суреттер: Алматы облысының өңірлік коммуникациялар қызметі

Жаңа форматтағы акцияға Қазақстанның белгілі пранкерлері, танымал Jokeasses блогерлер командасы шақырылып, Алматы облысының Қарулы күштері дапартаменті мамандары да қолдау көрсетті.