Алматылық жігіт қарызын алуға барамын деп жоғалып кетті

Алматылық 24 жастағы Зинур Хамитов 100 мың теңге берген қарызын алуға шыққаннан кейін жоғалып кетті. Бұл туралы Tengrinews.kz тілшісіне жігіттің анасы Альфия Хамитова айтып берді. 

Оның айтуынша, ұлы 23 тамызда сағат шамамен 20.00-де жұмыстан шыққан. Анасы ақшаны ұлына әріптесі қайтаруы керек болғанын айтады.

"Зинур мен әріптесі су тасымалдайтын компанияда жұмыс істейді. Ұлым - экспедитор, бұл компанияда жұмыс істеп жүргеніне бір айдан асты, ал әріптесі жүргізуші болып жұмыс істейді. Ол ақшалай қиындыққа тап болған, сол себепті Зинурдан қарыз сұраған. Ал ұлым мейірімді, содан оған қарызға берген.

Әріптесі ақшаны 23 тамызда қайтару керек болған. Сол күні жүргізуші жұмысқа шықпай, ақша іздеп жүрген. Ол Калинин ауылында тұрады. Балам сол жаққа барып, қайтып оралмады", - деді анасы. 

Соңғы рет әйел баласымен шамамен 22.08-де хабарласқан. Осыдан кейін оның телефоны сөндірулі тұр.

Әйел Алатау ауданы Ішкі істер басқармасына хабарлаған.