Арнайы жасақ Алматының орталығында күдіктілерді ұстады

Алматыда пәтер ұрылары ұсталды - деп хабарлайды Tengrinews.kz тілшісі Polisia.kz сайтына сілтеме жасап.

Алматы криминалдық полициясының қызметкерлері полицияның арнайы жасақтарының көмегімен қалада пәтер тонаумен айналысқан қылмыстық топты Байзақов пен Бұқар жырау көшелерінің қиылысында құрықтады. Оның құрамында - 38 бен 45 жас аралығындағы төрт ер адам бар. Олар - Қазақстанның Алматы және Жамбыл облыстарынан келгендер.

"Өткен демалыс күндері бұл күдіктілер темір торларды кесіп, терезені күштеп ашу арқылы Шашкин көшесіндегі үйлердің бірінің пәтеріне кіріп, бөтеннің мүлкін жасырын ұрлаған. Күдіктілерді ұстау барысында айғақты заттар, атап айтқанда, алтын бұйымдар мен ақшалай қаражат тәркіленді және қылмыстық іске қосылды. Күдіктілер қамауға алынды. Қазіргі уақытта осыған ұқсас қылмыстарға қатысы бар-жоғы анықталып жатыр. Қылмыстық істі Бостандық аудандық полиция Басқармасындағы әріптестерім тергеп жатыр", - деді, Алматы қалалық ПД криминалдық полиция басқармасының бастығы Талант Исаев.

ҚР ҚК-нің 201-бабына сәйкес өзге ақпарат тергеу мүддесіне орай жарияланбайды.

ҚР Конституциясының 77-бабы 3-бөлімі 1-тармағы, ҚР ҚК-нің 19-бабы 1-тармағына сай кез келген азамат сот шешімі заңды күшіне енгенге дейін кінәсіз деп саналады.

Сілтемесіз жаңалық оқисыз ба? Онда Telegram желісінде парақшамызға тіркеліңіз!