Асқар Жұмағалиев қайта құрылған министрлікті басқарады

Асқар Жұмағалиев цифрлық даму, инновациялар және аэроғарыш өнеркәсібі министрі болып тағайындалды, - деп хабарлайды Tengrinews.kz тілшісі Ақорда сайтына сілтеме жасап.

"Асқар Қуанышұлы Жұмағалиев Қазақстан Республикасының цифрлық даму, инновациялар және аэроғарыш өнеркәсібі министрі болып тағайындалсын, ол бұрынғы атқарған қызметінен босатылсын", - делінген Жарлықта. 

Осыған дейін Асқар Жұмағалиев цифрлық даму, қорғаныс және аэроғарыш өнеркәсібі министрі болды.

17 маусымда министрлік Цифрлық даму, инновациялар және аэроғарыш өнеркәсібі министрлігіне қайта құру жолымен құрылды. Ведомствоға ауыл шаруашылығы министрлігінің геодезия және картография саласындағы, сондай-ақ Индустрия және инфрақұрылымдық даму министрлігінің инновациялық қызмет, елдің ғылыми-техникалық дамуы саласындағы функциялары мен өкілеттіктері берілді.