Астана іргесіндегі отбасын аяусыз өлтіру ісі бойынша тергеу аяқталды

Астана маңындағы Жібек жолы ауылында бір отбасының аяусыз өлтірілуіне қатысты қоғамда үлкен резонанс тудырған қылмыстық істі тергеу аяқталды. Бұл туралы Ішкі істер министрінің бірінші орынбасары Санжар Әділов мәлімдеді, деп хабарлайды Tengrinews.kz.

Сенат кулуарында Әділов тергеу амалдарының толықтай аяқталғанын айтты.

"Қазіргі уақытта қылмыстық істі тергеу аяқталды, тараптар іс материалдарымен танысып жатыр", - деді ол.

Танысу процедурасы аяқталғаннан кейін іс материалдары сотқа жолданады.

Еске сала кетейік, наурыздың басында мессенджерлерде Астана маңындағы Жібек жолы ауылында бір отбасы мүшелерінің аяусыз өлтірілгені туралы ақпарат тараған болатын. Полицейлер ізін суытпай күдіктіні ұстап, оны уақытша ұстау изоляторына қамады.

Бұған дейін Сенатта Ішкі істер министрінің орынбасары Санжар Әділов күдіктінің бұрын сотталғанын айтты, алайда қандай қылмыс үшін екенін нақтыламады. Сондай-ақ Әділов күдікті бұған дейін ақыл-есі дұрыс емес деп танылғанын мәлімдеді.