Астананың орталығында өрт шықты: 8 пәтер зардап шеккен

Астана әкімдігі орталықта шыққан өрттің салдары туралы хабарлады. Сегіз пәтерге зақым келген. Бұл пәтерлер, сондай-ақ тұрғын үй кешенінің қасбеті өрт басталған дәмхана қожайындарының қаражатынан қалпына келтірілмек, - деп хабарлайды Tengrinews.kz тілшісі.

"18 қыркүйекте Достық көшесі, 12/1 мекенжайындағы 8 қабатты тұрғын үйдің бірінші қабатындағы KaRima кафесінде өрт шыққаны туралы хабарлама түсті. Әкімдік, ТЖД және қалалық Полиция департаменті бірлесіп, оқиға орнында жедел штаб құрды", - делінген хабарламада.

ТЖД мен Полицияның үйлесімді әрекетінің арқасында өрт тез арада жойылды. Зардап шеккендер мен қаза болғандар жоқ. Өрттің шығу себебі анықталып жатыр.

"Өрт салдарынан 8 пәтер зардап шекті. Тұрғындар қаланың қонақүйлеріне уақытша орналастырылады. Сондай-ақ барлық бағытта көмек көрсетіледі", - делінген әкімдік хабарламасында.

Алдағы тәулік ішінде бүлінген пәтерлерді жөндеу және фасадты қалпына келтіру жұмысы KaRima кафесі иелерінің қаражаты есебінен басталатыны айтылды.

Сілтемесіз жаңалық оқисыз ба? Онда Telegram желісінде парақшамызға тіркеліңіз!