Атырау облысында жоғалған аңшы төрт күннен бері іздестіріліп жатыр

Атырау облысында аңға шығып, хабарсыз кеткен ер адам төрт күннен бері іздестіріліп жатыр. Іздеу шараларына тікұшақ қосылды, - деп хабарлайды Tengrinews.kz тілшісі.

Облыстық ТЖД мәліметінше, іздеу-құтқару жұмыстары шамамен 100 шақырым радиуста үздіксіз жүргізіліп жатыр.

"Операцияға ТЖД мен полиция департаментінің жеке құрамы, сондай-ақ жоғалған азаматтың достары мен туыстары жұмылдырылған. Жалпы саны 43 адам, 11 техника және үш ұшқышсыз ұшу аппараты тартылған. Бүгін қосымша күштерді жұмылдыру жоспарланып отыр", - дейді ТЖД өкілдері.

Сонымен қатар іздеу барысында EC-033 тікұшағы да пайдаланылғаны хабарланды.

Еске салайық, 1964 жылы туған ер адам 14 желтоқсанда үйінен шығып, Ботақан кен орны маңында жоғалып кеткен. Аталған аумақ Құлсары қаласынан 65 шақырым, ал Атырау қаласынан шамамен 100 шақырым қашықтықта орналасқан.

Сілтемесіз жаңалық оқисыз ба? Онда Telegram желісінде парақшамызға тіркеліңіз!