"Барлық шектеу алынды". ДСМ коронавируспен екі жылдық күрес қорытындысын жариялады

Денсаулық сақтау министрлігі Қазақстандағы коронавируспен екі жылдық күрестің қорытындысын жариялады, - деп хабарлайды Tengrinews.kz тілшісі. 

Ведомство Қазақстанда коронавирус инфекцияның алғашқы жағдайлары 2020 жылғы 13 наурызда тіркелгенін және соңғы екі жыл ішінде елімізде сырқаттанушылықтың таралуын болдырмауға және оның алдын алуға бағытталған іс-шаралар жүзеге асырылып жатқанын атап өтті.

"Қазақстанда пандемия жарияланған алғашқы күннен бастап Ведомствоаралық комиссия құрылды, Комиссия 2 мыңнан астам жедел және ұтымды шешімдер қабылдады. Комиссия  COVID-19-дан халық денсаулығын сақтау және қорғау, мемлекеттік органдардың өзара іс-қимылы, медициналық ұйымдардың инфрақұрылымын нығайту, дәрілік заттарды, иммундық-биологиялық препараттарды, медициналық мақсаттағы бұйымдар мен жабдықтарды, жеке қорғаныш құралдарын сатып алу мәселелері бойынша, елдегі және әлемдегі эпидемиологиялық жағдайды ескере отырып, шектеу шараларын күшейту және жеңілдету мәселелері бойынша шешімдер қабылдайды", - делінген хабарламада. 

Пандемия барысында халықаралық тәжірибені, эпидемиологиялық жағдайды және эпидемияға қарсы күрес пен елдегі іскерлік белсенділікті сақтау арасындағы балансты ескере отырып, алдын алу, емдеу, шектеу шараларын енгізу тәсілдері үнемі жетілдіріліп отырған.

"Халықаралық тәжірибені ескере отырып, коронавирус инфекциясын диагностикалау мен емдеудің клиникалық хаттамалары қайта қаралып, үнемі жетілдіріліп отырды. Екі жыл ішінде сырқаттанушылық 1 айдан 3 айға дейін созылып 5 рет көтерілді. Бұл ретте сырқаттанушылықтың әрбір көтерілуі алдыңғы сырқаттанушылықтан жоғары болды", - дейді министрлік өкілдері. 

Бүгінде эпидемиологиялық жағдайдың тұрақтануы байқалады, күн сайын 100-ге жуық жағдай тіркеледі.

"Уақтылы медициналық көмек көрсету үшін қалаларда қысқа мерзімде 16 модульдік аурухана салынды және 3 инфекциялық аурухана реконструкцияланды, сондай-ақ 63 амбулаториялық-емханалық ұйым пайдалануға берілді. 64 оттегі станциясы пайдалануға берілді, 3 мыңнан астам (өкпені жасанды желдету) ӨЖЖ аппараты сатып алынды. 185 аудандық аурухана 100 пайыз рентгендік диагностикалық жабдықтармен жабдықталды. Жедел медициналық көмек қызметі 1 367 бірлік автокөлік сатып алу арқылы күшейтілді, жылжымалы медициналық кешендер паркін 100 пайыз жарақтандыруға қол жеткізілді", - делінген ведомство хабарламасында.

Еліміздің 184 зертханасында коронавирус инфекциясының ПТР диагностикасы жүргізіліп жатыр, пандемия басталғалы бері республикада 22 миллионнан астам зерттеу жүргізілген.

"ПТР диагностикасын қамтамасыз етумен қатар, сырттан әкелінген жағдайларды және вирустың мутациялық өзгергіштігін мониторингілеуді қамтамасыз ету үшін Министрлік вирустарды генетикалық зерттеуді үнемі жүргізіп отырды (1331 сынаманы 26420 зерттеу жүргізілді). Республика аумағында коронавирус инфекциясының 5 штамының (Альфа, Бета, Дельта, Эта, Омикрон) айналымы анықталды. Дәрілік заттардың тұрақтандыру қорлары құрылды. Коронавирус инфекциясын емдеу үшін 2 айлық дәрі-дәрмек қоры құрылды.

Біздің денсаулық сақтау жүйеміздің және медицина қызметкерлерінің дайындығының арқасында біз пандемиямен күресіп келеміз және бұл барлық қиындықтарға, шаршағанына қарамастан,  коронавируспен күресіп жатқан барлық медицина қызметкерлерінің еңбегінің нәтижесі деп айтуға болады", - делінген хабарламада. 

КВИ бойынша профилактикалық және эпидемияға қарсы іс-шараларды уақтылы жүргізу аурудың таралу қарқынын тежеуге және денсаулық сақтау жүйесінің шамадан тыс жүктемесіне жол бермеуге ықпал етті.

"Өткен жылдың 1 ақпанынан бастап тұрғындарды вакциналау басталды. Біздің елімізде Қарағанды фармацевтикалық кешенінің базасында "Спутник V", "Спутник Лайт" (Ресей) вакциналарын өндіру іске қосылды. Ұлттық биологиялық қауіпсіздік институтының базасында QazVac отандық вакцинасы әзірленді және өндіріліп жатыр. Коронавирус инфекциясына қарсы халықты ревакцинациялау жалғасып жатыр.

Вакцинация науқаны басталғалы бері республика азаматтарына вакциналардың 6 түрі (Спутник V, QazVac, Hayat-Vax, SinoPharm, Спутник Light және Pfizer) қолжетімді. Барлығы I компонентпен 10,3 миллион адам, II компонентпен - 9,7 миллион адам вакцинацияланды. 2,9 миллион адам қайта вакцинацияланды", - делінген министрлік хабарламасында. 

Коронавирус инфекциясымен күресуде ақпараттық жүйелер кеңінен қолданылады.

"2021 жылғы қаңтарда шектеу шаралары мен бизнес жұмысы арасындағы балансты белгілеу мақсатында бірыңғай интеграциялық порталмен және вакцинациялаудың электрондық паспортымен интеграцияланған Ashyq мобильді қосымшасы енгізілді, осы мобильдік қосымша науқастар мен байланыста болған адамдарды қадағалауға мүмкіндік береді және жаппай жиналатын орындарға бару қауіпсіздігін қамтамасыз етеді. Зертханалық зерттеулердің бірыңғай базасы әзірленді, онда меншік нысанына қарамастан, барлық зертхана жүргізетін COVID-19-ға ПТР-зерттеулердің орталықтандырылған есебі жүргізіледі", - дейді ведомство өкілдері. 

30 елде (Аргентина, Белиз, Боливия, Ұлыбритания, Мажарстан, Грузия, Индонезия, Иран, Иордания, Канада, Қырғызстан, Мальдив, Моңғолия, Армения, Беларусь, Молдова, Перу, Сан-Марино, Сербия, Тунис, Үндістан, Филиппин, Таиланд, Түркия, Эстония, Жапония, Чехия, Черногория, Шри-Ланка, Эквадор) танылатын электрондық вакцинация паспорты енгізілген.

"Эпидемиологиялық жағдайды ескере отырып, біз шектеу шараларын қайта қарастырдық. Бүгінде эпидемиологиялық тәуекелдің қызыл аймағында орналасқан аймақтарды қоспағанда, барлық шектеу шарасы алынды. Коронавирус инфекциясының пандемиясы әлі аяқталған жоқ, сондықтан вакцинация мен ревакцинацияның пайдасына дұрыс таңдау жасау керек, бұл ұжымдық иммунитеттің қалыптасуына және елдегі эпидемиологиялық жағдайдың тұрақтануына септігін тигізеді", - дейді министрлік өкілдері. 

Сілтемесіз жаңалық оқисыз ба? Онда Telegram желісінде парақшамызға тіркеліңіз!