Бекет ата мешітінен видео жіберіп, жоғалып кетті - Маңғыстауда үш адам іздестіріліп жатыр

Басылымның мәліметінше, 2 шілдеде 34 жастағы Қанатбек Жұбатқанов, 31 жастағы Ақмарал Бисенова және 20 жастағы Мархабат Бисенова Great Wall автокөлігімен Бекет ата мешіті бағытына қарай жолға шыққан.

Олар кейінгі рет 2 шілдеде байланысқа шыққан, Бекет ата мешіті аумағынан WhatsApp арқылы видео жіберген. Содан кейін байланысқа шықпаған. Қазір олардың қайда екені белгісіз.

Маңғыстау облысының полиция департаменті қазір ауқымды іздестіру шаралары жүргізіліп жатқанын мәлімдеді.

"Жоғалғандардың қайда екенін анықтау үшін полиция қызметкерлері, ТЖД бөлімшелері, "Охотзоопром" ӨБ" РМҚК мамандары, сондай-ақ басқа да шұғыл және бейінді қызметтер жұмылдырылды. Іздестіру жұмыстарына тікұшақтар, арнайы техника және қажет жабдықтар қолданылып жатыр. Іздеу жұмыстары барынша көп күш пен құралдарды тарта отырып, бір мезгілде бірнеше бағыт бойынша жүргізіліп жатыр", – деп хабарлады ведомстводан.

Полиция барлық жұмылдырылған қызмет күшейтілген режимде жұмыс істеп жатқанын және жоғалғандардың орналасқан жерін тезірек анықтау үшін шаралар қабылдап жатқанын атап өтті.

Іздеу жұмыстарына еріктілер де қосылды. Олар өңір тұрғындарынан жергілікті жерді тексеруге, соның ішінде дрондарды қолдану арқылы көмек көрсетуді сұрады.

Еске сала кетейік, бұған дейін Алматы облысында деменциямен ауыратын зейнеткер іздестіріліп жатыр. Туыстарының айтуынша, 70 жастағы зейнеткер 11 маусымда үйінен шығып кеткен. Бейнебақылау камераларындағы жазбаға қарағанда, қарт адам автобусқа мініп, «Алтын Орда» базарына қарай кеткен.