Ішімдік, Интернет және шектеусіз кездесулер - жаза өтеп жатқан Ермегияевке жағдай жасағандар қамалды

Сыбайлас жемқорлыққа қарсы іс-қимыл ұлттық бюросының өкілдері Астана қаласындағы қатаң тәртіптегі колония басшылығының "Астана ЭКСПО-2017" басқармасының экс-төрағасы Талғат Ермегияевке қамқорлық әрекеттерін анықтап, жолын кесті, - деп хабарлайды Tengrinews.kz тілшісі ведомствоның баспасөз қызметіне сілтеме жасап. 

"Жазасын өтеп жатқан Ермегияевке ыңғайлы жағдай жасады деген күдікпен ЕЦ-166/10 түзету мекемесінің басшысы әділет полковнигі Ң.С.Әбен мен оның орынбасары әділет майоры Т.О.Мұсаев ұсталып, қамауға алынды", - делінген хабарламада.

Бұл лауазымды тұлғалардың Ермегияевке алкогольді ішімдік ішуіне, ұялы телефон мен интернет қолдануына мүмкіндік жасағаны, сондай-ақ шектеусіз кездесулер ұйымдастырғаны айтылады.

Сонымен қатар, қылмыстық-атқару жүйесінің 13 лауазымды тұлғасына қатысты жаза қолданылған. Тергеу жалғасып жатыр.