Жамбыл облысы Жуалы ауданында тұрғын үй мен спорт клубы пайдалануға берілді

Жуалы ауданының Ақбастау ауылында тұрмысы төмен жас отбасына "Асарлатып үй салу" жобасы аясында жаңа тұрғын үйдің кілтін табыстау және ауыл жастарына "Рысбек" спорт клубының ашылу салтанаты өтті.

Тұрғын үйдің жалпы алаңы 72 шаршы метр, онда үш тұрғын, бір ас және жуынатын бөлме бар.

Өз кезегінде, Ақбастау ауылының тумасы, жеке кәсіпкер Жандос Баетов өз қаражаты есебінен ауылда бос тұрған ескі дүкен ғимаратын сатып алып, күрделі жөндеу жұмыстарын жүргізіп, спорт нысанына айналдырған.

Бүгінгі күні "Рысбек" спорт клубындағы үстел теннисі, бокс және күрес үйірмелеріне 50 бала қатысуда.

Спорт клубының ауласында кіші футбол, волейбол, StreetWorkout алаңшаларын ашу жоспарлануда.