Жасырын орын туралы сотталған адам айтқан: Балқашта қаңтар оқиғасы кезіндегі қару-жарақ табылды

Қарағанды және Ұлытау облыстары бойынша Қылмыстық-атқару жүйесі департаментінің № 31 мекемесі (колония) қызметкерлеріне ықтимал жасырын орын туралы ақпаратты сотталғандардың бірі айтқан.

Жедел уәкілдер ақпаратты тексеріп, қару жасырылуы мүмкін орынды анықтады. Іздестіру шараларына ҰҚК департаментінің қызметкерлері қосылып, жұмыс прокуратураның қатысуымен жүргізілді.

"Биыл 27 маусымда Балқаш қаласының Таранғалық кентіне кіреберістегі иесіз қалған құс фабрикасының аумағын тексеру барысында құқық қорғау органдары мұқият жасырылған орынды тапты. Оның ішінен қаңтар оқиғасы кезінде ұрланған тізімінде бар төрт атыс қаруы табылды", - деп хабарлады Қарағанды және Ұлытау облыстары бойынша ҚАЖД баспасөз қызметі.

Сурет: Қарағанды және Ұлытау облыстары бойынша ҚАЖД баспасөз қызметінен

Құқық қорғау органдары қаңтар оқиғасынан кейін белгісіз тұлғалардың қолында қалуы мүмкін қару-жарақты іздеу жұмыстарын жалғастырады. Табылған қарулар қылмыстық мақсатта қолданудың алдын алу үшін тәркіленіп жатыр.

Алматыда Сайран жағалауынан қаңтар кезінде ұрланған қару-жарақ табылды

Еске салайық, бұған дейін Алматыда Сайран көлінің жағасынан қаңтар оқиғасы кезінде ұрланған қару табылған болатын. ІІМ мәліметінше, жыл басынан бері құқық қорғау органдары 900-ден аса қару тәркілеген, оның 74-і 2022 жылдың қаңтарында ұрланған. Сондай-ақ төрт мыңнан аса оқ-дәрі алынды.