“Жүкті“ әйел мас күйде рөлге отырып, жол апатына ұшыраған

Павлодар облысында сот мас күйде жол апатына түскен әйелге қатысты жазаны қатаңдатты, - деп хабарлайды Tengrinews.kz өңірлік прокуратураға сілтеме жасап.

Ақсу қалалық прокуратурасы мәліметінше, жүргізуші куәлігі жоқ әйел көлікті мас күйде басқарып, жол-көлік оқиғасына түскен.

Іс сотта қаралған кезде жүктілігі туралы анықтама ұсынылып, соның негізінде жаза жеңілдетілді - әкімшілік қамау айыппұлмен алмастырылған.

Алайда прокуратура тексерісі медициналық құжаттың жалған екенін анықтады. Аталған дерек бойынша ҚР Қылмыстық кодексінің 416-бабы (Дәлелдемелерді және жедел-іздестіру, қарсы барлау материалдарын бұрмалау) бойынша сотқа дейінгі тергеу басталды. Сонымен қатар, полиция қызметкерлеріне қатысты да жеке тергеу жүріп жатыр.

Прокуратура істі қайта саралап, жазаны өзгертуді - айыппұлды әкімшілік қамауға ауыстыруды талап етіп, апелляциялық өтініш берді.

Облыстық соттың апелляциялық алқасының қаулысы бойынша, әйел 20 тәулікке қамауға алынды.