+7 (777) 001 44 99
Қазақша
Русский
English
15 қазан 2016 | 13:58
Каир қаласында Абай ескерткіші ашылды
13 қазанда Мысыр Араб Республикасының астанасы Каир қаласында қазақтың ұлы ақыны әрі ойшылы Абай Құнанбайұлына арналған ескерткіштің салтанатты ашылу рәсімі өтті, - деп хабарлайды Tengrinews.kz тілшісі ҚР СІМ баспасөз қызметіне сілтеме жасап. Абай ескерткіші Каир орталығындағы ең көрікті жерлердің бірі "Еркіндік және достық" саябағына қойылды.
ПОДЕЛИТЬСЯ
13 қазанда Мысыр Араб Республикасының астанасы Каир қаласында қазақтың ұлы ақыны әрі ойшылы Абай Құнанбайұлына арналған ескерткіштің салтанатты ашылу рәсімі өтті, - деп хабарлайды Tengrinews.kz тілшісі ҚР СІМ баспасөз қызметіне сілтеме жасап. Абай ескерткіші Каир орталығындағы ең көрікті жерлердің бірі "Еркіндік және достық" саябағына қойылды.
Іс-шараға Мысырдың сыртқы істер, халықаралық қатынастар және мәдениет министрліктерінің өкілдері, дипломатиялық корпустың мүшелері, мысырлық жетекші БАҚ журналистері, қоғам қайраткерлері, сондай-ақ, Мысырда оқитын және тұратын қазақстандық азаматтар қатысты.
Салтанатты рәсімде Қазақстанның Мысырдағы Елшісі әрі осы идеяның бастамашысы болған Берік Арын, Каир губернаторының орынбасары Мұхаммед Айман, сондай-ақ осы істің демеушісі және мүсіннің авторы сөз сөйледі.
Елші сөзінде Абайдың қазақ және әлемдік әдебиетке қосқан үлесіне тоқтала келіп, оның 150 жылдық мерейтойына орай ЮНЕСКО халықаралық ұйымының 1995 жылды "Әлемдегі Абай жылы" деп жариялауы ақын таланты мен еңбегінің әлемдік деңгейде мойындалуының нақты айғағы екендігін атап өтті. Қазақстанның Тәуелсіздігінің 25-жылдығына орай ұлы ойшылға арналған ескерткіштің Елордамен бауырлас Каир қаласында қойылуы - екі ел халықтары арасындағы көпжылдық достықтың беріктігін дәлелдейді деді.
Өз тарапынан Каир губернаторының орынбасары "Абай ескерткішінің Мысыр астанасының орталығында ашылуы - ол мегаполис үшін қазақ және мысыр халықтарының рухани-мәдени жақындығын білдіретін айтулы оқиға" деп атап өтті. Оның айтуынша Каир губернаторлығы қазақ халқының ұлы перзентіне ескерткіш орнату жайындағы идеяны қуана қарсы алып, оның жүзеге асыруда барынша мүмкіндіктер жасады. Кейінірек сөз алғандар Абай шығармаларындағы гуманистік идеялардың өзектілігі бүгінгі күні арта түсетіндігін айтты.
Іс-шара соңында Мысырдағы қазақстандық студенттер Абай лирикалық өлеңдерін орындады. Сонымен қатар, қонақтарға араб тіліне аударылған Абайдың "Қара сөздері" мен өлеңдер жинағы сыйға тартылды.
Ескерткіш Қазақстанның Каирдегі Елшілігінің қолдауымен мысырлық меценат, Қазақстан мен Мысыр достығы ассоциациясының мүшесі доктор Хусейн Әл-Шафиидің қаражатына қойылғандығын, ал мүсіннің авторы қолтумалары Каирден басқа Мәскеу, Санкт-Петербург, Қазан және Ташкент қалаларында орнатылған белгілі мысырлық скульптор Усама Әл-Серуи болғандығын атап өту керек.
Ведомстводағылардың мәліметінше, 1998 жылдан бері мысырлық көшелердің бірі Абай атымен аталады, ал Астананың орталық көшелерінің біріне мысырлық белгілі жазушы және әдебиеттанушысы Таха Хусейннің есімі берілген. Бүгінде қазақтың ұлы ақыны әрі ағартушысы Абайдың ескерткіштері Мәскеу, Бейжің, Ташкент, Витебск, Тегеран, Ыстамбұл және Будапештте орнатылған.
Показать комментарии
Читайте также
