Қайрат Сатыбалдыұлынан тәркіленген бизнес-орталық айтарлықтай арзандады

Алматыда бұрын Қайрат Сатыбалдыға тиесілі болған Kaisar Plaza бизнес-орталығы тағы да электронды саудаға шығарылды. Бұл жолы ғимараттың бағасы 7 миллиард теңгеге арзандап, нақты құнына жақындады, деп хабарлайды Tengrinews.kz.

Не болды?

Kaisar Plaza кезекті рет саудаға қойылды. Бұл жолы бастапқы баға – 54 миллиард теңге. Сауда-саттық бағаны көтеру әдісімен өтеді.

Бұл – Алматы қаласындағы Желтоқсан көшесінің бойында орналасқан тоғыз қабатты кеңсе ғимараты. Нысанның жалпы ауданы шамамен 64 мың шаршы метрді құрайды. Ғимаратта 53 жалға алушы жұмыс істейді, ал жер телімі 2030 жылға дейін жалға берілген.

Негізінен мұнда кеңсе жайлары орналасқан.

Скриншот: e-qazyna.kz сайтынан

Бизнес-орталықты 7 сәуірде де сатылымға шығарған болатын – ол кездегі бастапқы баға кемінде 61,5 миллиард теңге болды. Бірақ сатып алушылар табылмады. Бұған ғимараттың нақты құнынан 15 миллиард теңгеге қымбат болуы себеп болса керек.

Мән-жайы

Бастапқы баға 61,5 миллиард теңге болғанымен, бағалаушылардың есептеген сомасы одан аз. Құжаттардағы мәліметтерге сәйкес, ғимараттың нарықтық құны 44,7 миллиард теңгені құрайды. Ал ол тұрған жер телімі – 2,8 миллиард теңге.

Скриншот: e-qazyna.kz сайтынан

Жалпы алғанда, бұл "мәміле жасау үшін ұсынылған бағалар" еді. Алайда актив иесі (Қайтарылған активтерді басқару компаниясы – ҚАБК) лотты қымбатырақ бағаға қоюды ұйғарды. Бірақ пайда табудың сәті түспеді, бизнес-орталық әлі де олардың теңгерімінде тұр.

Ондағылар бизнес-орталықтың қаншаға сатылатынын ҚАБК "ішкі ережелерге" сүйене отырып, өзі анықтайтынын айтты. Баға келесі факторларға байланысты:

• тәуелсіз бағалаушы дайындаған бағалау туралы есепке;
• нарықтық факторлар мен нысанның инвестициялық тартымдылығына.

"Бизнес-орталықтың одан арғы тағдыры компанияның ішкі ережелері мен қолданыстағы заңнамаға сәйкес айқындалады. Ашық әрі айқын рәсімдер арқылы өткізу басымдық болып қала береді. Шарттар өзгерген немесе өзге де шешімдер қабылданған жағдайда ақпарат белгіленген тәртіппен жеткізіледі", – деп хабарлады ҚАБК.

Енді "ішкі ережелер" бойынша лот бағасын 7 миллиард теңгеге төмендетіп, қайтадан сатуға шешім қабылдаған көрінеді. Сауда-саттық 17 маусымға жоспарланған.

Сатыбалдыұлынан Kaisar Plaza неліктен алынды?

Қайрат Сатыбалдыұлы – Қазақстанның экс-президенті Нұрсұлтан Назарбаевтың немере інісі.

2022 жылы ол 6 жылға бас бостандығынан айырылды. Тергеу мәліметтері бойынша, ол "Қазақтелекомға" 12 миллиард теңгеден астам шығын келтіріп, "Көлік сервисі орталығының" мүлкін талан-таражға салуға қатысы болған.

2023 жылы тергеу басқа эпизодтар бойынша жалғасты. Қаңтар айында Сатыбалдыұлы ақшаны жылыстату ісі бойынша кінәсін мойындады. Осы оқиғалар аясында 2024 жылы Kaisar Plaza бизнес-орталығы оның мемлекетке қайтарған активтерінің тізіміне енді.

Осы тергеу амалдарынан кейін Қайрат Сатыбалдыұлынан тәркіленді: көптеген ірі активтер тәркіленіп, мемлекетке қайтарылды. Аралық бағалау бойынша, олардың жалпы құны 730 миллиард теңгеден асқан.

Олардың ішінде:

• Алматыдағы Kaisar Tower бизнес-орталығы (7,9 миллиардтан астам) университетке берілді;
• құны 800 миллион теңгеден асатын әкімшілік ғимарат – Жүргенов атындағы Өнер академиясына берілді;
• Астанадағы жалпы құны 5 миллиард теңгеден асатын үш зәулім үй – мүгедектігі бар балаларға арналған орталыққа берілді.

Сондай-ақ мемлекет меншігіне ірі коммерциялық нысандар өтті:

• Kaisar Plaza – шамамен 33,5 миллиард теңге;
• DoubleTree by Hilton қонақ үйі – 6,49 миллиард теңге;
• "АрСат" бизнес-орталығы – 8,9 миллиард теңге;
• "Майсат" бизнес-орталығы – 5,2 миллиард теңге;
• "Мегатау" сауда үйі – 8,9 миллиард теңге;
• "Байсат" базары – 15,9 миллиард теңге;
• Астанадағы "Оптимум" бизнес-орталығы – 3,2 миллиард теңге.

Сонымен қатар шетелден ондаған миллиард теңге болатын активтер – ақша, жылжымайтын мүлік және бағалы қағаздар қайтарылды. Оның ішінде Австрия, Лихтенштейн, Түркия және БАӘ-ден қайтарылғандары бар.

Олардың қатарында: Дубайдағы шамамен 20 миллиард теңгелік екі вилла, Францияның Лазурлы жағалауындағы 4 пәтер – шамамен 4 миллиард теңге, Мәскеудегі 15 жылжымайтын мүлік нысаны – 5 миллиард теңге, Түркиядағы (Бодрум және Стамбул) жылжымайтын мүлік – 4 миллиард теңгеден астам.

2024 жылғы тамызда Өскемен қалалық соты Қайрат Сатыбалдының жазаны жеңілдету туралы жазаны жеңілдету туралы өтінішін қанағаттандырды. Сот келісімін беріп, бас бостандығынан айыру жазасының қалған мерзімін 3 жыл, 3 ай және 7 күнге бас бостандығын шектеу жазасына ауыстырды.