Қазақстанда 40-қа жуық кен орны сатылымға шығарылды

Қазақстанның Индустрия және құрылыс министрлігі пайдалы қазбалардың 39 кен орны бойынша электронды аукцион жариялады, - деп хабарлайды Tengrinews.kz тілшісі.

Аукцион 2025 жылғы 19 қыркүйекте сағат 11:00-де мемлекеттік мүлік тізілімінің веб-порталы e-qazyna.kz сайтында өтеді. Қатысуға өтінімдер 2 қыркүйекке дейін minerals.e-qazyna.kz электрондық платформасы арқылы қабылданады.

Аукцион аясында алтын, никель, кобальт, марганец, темір кені, көмір, асбест, барит және басқа да пайдалы қазбалар бар учаскелер ұсынылады.

Көптеген кен орындары бойынша қол қою бонусы 1 966 000 теңге болады. Аукционға қатысушылар:

• 100 АЕК мөлшерінде қатысу жарнасын,
• сондай-ақ бастапқы бонус мөлшерінің бес есе көлемінде кепілдік жарнаны төлеуге міндетті.

Сонымен қатар, жеңімпаздар:

• жылдық жиынтық табысының кемінде 1 пайызын өңірдің әлеуметтік-экономикалық дамуына инвестициялауға,
• егер учаске елді мекендердің буферлік аймағында орналасқан болса, жерасты тәсілімен өндіруді жүргізуге,
• сондай-ақ кейбір кен орындары бойынша шикізатты Қазақстан аумағындағы өндірістік қуаттарда өңдеуге міндетті.

Сілтемесіз жаңалық оқисыз ба? Онда Telegram желісінде парақшамызға тіркеліңіз!