Қазақстанда балық жаппай қырылған видео тарады. Ауыл шаруашылығы министрлігі не дейді?

Әлеуметтік желілерде Батыс Қазақстан облысында балықтар жаппай қырылғаны туралы видео таралып жатыр. Бұл ақпаратқа Ауыл шаруашылығы министрлігінің балық шаруашылығы комитеті пікір білдірді, - деп хабарлайды Tengrinews.kz тілшісі.

Бұған дейін Instagram-да "Қазақстан ЗКО Оральск" деген жазуы бар видео пайда болды. Кадрларда мұздың астындағы қатып қалған балықтар көрсетілген.

"Қараңыздар, екі күн бұрын мұнда су болған, тірі балықтар жүрген, шортандар. Міне, қаншама балық", – дейді кадр сыртындағы дауыс.

Балық шаруашылығы комитетінің мәліметінше, әлеуметтік желілерге мониторинг жүргізу барысында Жайық-Каспий су шаруашылығы бассейні инспекциясы бұл видеороликтің 14 ақпанда Telegram-да жарияланғанын және шын мәнінде Ресейдің Астрахань облысында түсірілгенін анықтаған.

"БҚО аумағындағы су айдындарындағы мұздың қалыңдығы 30-40 сантиметрге жетеді, ал видеодағы климаттық және ауа райы жағдайлары мүлдем өзгеше. БҚО балық инспекциясы басқармасының мамандары облыс аумағындағы су айдындарында күнделікті бақылау және қадағалау жұмыстарын жүргізіп жатыр", – деді комитет.

Сілтемесіз жаңалық оқисыз ба? Онда Telegram желісінде парақшамызға тіркеліңіз!