Қазақстанда күн салқындайды: синоптиктер нөсер туралы ескертті

"Қазгидромет" синоптиктері 30 маусым, 1 және 2 шілдеге арналған ауа райы болжамын ұсынды, деп хабарлайды Tengrinews.kz.

Циклон Қазақстанға жаңбыр мен найзағай әкеледі

Болжамға сәйкес, таяу күндері белсенді циклон мен атмосфералық фронталды бөліктердің өтуіне байланысты Қазақстанның басым бөлігінде күн райы құбылмалы болады. Жаңбыр жауып, найзағай ойнайды, бұршақ жаууы және екпінді жел соғуы мүмкін, сондай-ақ республика бойынша нөсер жаңбыр болжанады.

Қай өңірлерде күн салқындайды?

Елдің батысы мен солтүстік-батысында күндізгі ауа температурасы +18...+28 градусқа дейін төмендейді.

Қазақстанның солтүстігінде термометр бағаны +22-ден +30 градусқа дейін төмендейді деп күтіледі.

Оңтүстікте аптап ыстық сәл басылады, алайда температура әлі де жоғары деңгейде – +23-тен +35 градусқа дейін сақталады.

Қай өңірлерде аптап ыстық сақталады?

Қазақстанның шығысы, солтүстік-шығысы мен оңтүстік-шығысында аптап ыстық сақталады. Бұл аймақтарда синоптиктер +30...+38 градусқа дейінгі қатты ыстықты болжап отыр.

Қазақстанда 2026 жылдың шілде айы қандай болады?

Бұған дейін синоптиктер Қазақстандағы 2026 жылдың шілде айына арналған алдын ала ауа райы болжамын ұсынған болатын. Метеорологтардың мәліметінше, Қазақстанның басым бөлігінде ауа температурасы климаттық норма шамасында болады деп күтілуде, алайда бірқатар өңірлерде ай әдеттегіден ыстық болады. Толығырақ осы жерден оқыңыз.