Қазақстанда сотталғандарға рақымшылық жасалады: оған кімдер ілігуі мүмкін?

Мәжіліс рақымшылық жасау туралы заң жобасын қарайды. Мәжіліс депутаты Абзал Құспан бұл амнистияға кімдер ілігуі мүмкін екенін айтты, - деп хабарлайды Tengrinews.kz тілшісі.

"Әзір айтуға ерте, бірақ бұл (заңның қабылдануы – еск.) депутаттар бастамасымен көтерілді. Атап айтқанда, қаңтарда Мәжіліс депутаты Қарақат Әбден Үкіметке депутаттық сауал жолдады, Үкімет оны қолдады. Осыдан кейін заң жобасын әзірлеп, Үкіметтің қорытындысына жолдадық. Бүгін қабылдануы тиіс", – деді депутат Құспан.

Мәжілісменнің айтуынша, алдын ала болжам бойынша амнистия ең алдымен сотталған азаматтардың осал санаттарын қамтиды.

"Бірінші кезекте бұл – зейнеткерлер, кәмелетке толмағандар, балалары бар аналар, қылмыс жасаған сәтте балаларын жалғыз тәрбиелеп отырған әкелер және тағы басқалар. Негізінен, қоғамға қауіп төндірмейтін адамдарға амнистия жасау – классикалық нұсқа", – деді депутат Абзал Құспан.

Экономикалық қылмыстар бойынша сотталғандар амнистияға ілігуі мүмкін бе деген сұраққа депутат:

"Егер ұрлық пен алаяқтық бойынша келтірілген залал өтелсе – олар амнистияға ілігеді", – деп жауап берді.

Айта кетейік, бүгін Мәжілісте "Қазақстан Республикасы Конституциясының 30 жылдығына байланысты амнистия туралы" заң жобасы бойынша қорытынды қаралады.

Сілтемесіз жаңалық оқисыз ба? Онда Telegram желісінде парақшамызға тіркеліңіз!