Қазақстанда Telegram-арнаның 8 мың жазылушысын полиция тексереді

Түркістан облысының прокуратурасы Telegram желісіне талдау жүргізу барысында порнографиялық сипаттағы, cоның ішінде кәмелетке толмағандарға қатысты фото/видео көруге арналған ақылы арнаны тапты, - деп хабарлайды Tengrinews.kz тілшісі.

Тексеріс барысында Telegram желісінде 2500 теңгеге порнографиялық бейнероликтер, оның ішінде кәмелетке толмағандар мен мектеп оқушыларына қатысты материалдар ұсынылғаны анықталды.

Сайтта барлығы 8012 жазылушы тіркелген.

"Желі аудиториясы - Қазақстан және ТМД елдерінің жазылушылары. Арнайы іс-шаралар нәтижесінде сайт ұйымдастырушылары, қарау, кіру және жазылу үшін ақша төленетін дроперлер анықталды", - деп жазылған хабарламада.

Топ мүшелері Түркістан және Қызылорда облыстарында ұсталған. Ұйымдастырушы бұған дейін ауыр қылмыс жасағаны үшін сотты болған, қазір ол қамауға алынды.

"Бұл деректерге қатысты ҚР Қылмыстық кодексінің 311-бабы және 312-бабы 1-бөлігі бойынша соталды тергеп-тексеру басталды", - деп жазылған хабарламада.

Сілтемесіз жаңалық оқисыз ба? Онда Telegram желісінде парақшамызға тіркеліңіз!