Қазақстандағы инфляция туралы мәлімет жарияланды

Ұлттық статистикалық бюро Қазақстандағы инфляция туралы мәліметтерді жариялады, - деп хабарлайды Tengrinews.kz тілшісі.

2025 жылғы ақпанда тұтыну бағаларының айлық индексі 1,5 пайыз болды (2025 жылғы қаңтарда – 1,1 пайыз). Ақылы қызметтер – 2,1 пайыз, азық-түлік тауарларының бағасы – 1,5 пайыз, азық-түлік емес тауарлар 1 пайыз өскен.

"Тұрғын үй-коммуналдық қызметтер саласында төлемақы суық суға – 29,2 пайыз, орталықтан жылытуға – 6,2 пайыз, ыстық суға – 5,3 пайыз, домофонға – 4,7 пайыз, электр энергиясына 1,8 пайыз өсті. Монша қызметтері – 2,1 пайыз, дәрігерге алғаш қаралу қызметтері – 1,9 пайыз, шаштараздар мен сұлулық салондарының қызметтері 1,3 пайыз қымбаттады.

Азық-түлік тауарларынан баға қиярға – 12,7 пайыз, қырыққабатқа – 12,3 пайыз, картопқа – 16,4 пайыз, қызанаққа – 6,1 пайыз, қызылшаға – 5,1 пайыз, лимонға– 4,9 пайыз, сиыр етіне – 3,7 пайыз, сарымсаққа – 3,2 пайыз, картопқа, жүзімге – 3,1 пайыз, күнбағыс майына – 3 пайыз, алмаға – 2,7 пайыз, қой етіне 2,3 пайыз өсті. Бағаның төмендеуі апельсинге – 2,2 пайыз, күрішке – 1,4 пайыз, жұмыртқаға – 1,2 пайыз қарақұмық жармасына 1 пайыз байқалды", - делінген хабарламада.

Биылғы ақпанда тұрмыстық бұйымдарға баға 2,5 пайыз, автомобильдерге – 1,3 пайыз, құрылыс материалдарына – 1,1 пайыз, киім мен аяқ киімге 1 пайыз өсті. Баллондағы сұйытылған газ 10,5 пайыз қымбаттаған.

Өңірлер ішінде ең жоғары айлық инфляция Астанада – 2,9 пайыз (орташа республикалық деңгейден 1,4 п.т. жоғары), ең төмені Абай және Қызылорда облыстарында – әрқайсында 0,7 пайыздан тіркелген. Өңірлер бөлінісінде азық-түлік тауарларының ең жоғары бағасы Шымкент қаласында 3 пайыз, азық-түлік емес тауарлар – Маңғыстау облысында 2,5 пайыз, ақылы қызметтер – Астана қаласында 4 пайыз өсті.

2025 жылғы ақпанда жылдық мәнде инфляция деңгейі 9,4 пайыз болған. Ақылы қызметтердің бағасы – 14,1 пайыз, азық-түлік емес тауарлардың бағасы – 8,7 пайыз, азық-түлік тауарларының бағасы 6,5 пайыз жоғарылады.

"2024 жылғы ақпанмен салыстырғанда суық суға тарифтер – 70,7 пайыз, электр энергиясына – 21 пайыз, орталықтан жылытуға – 18,2 пайыз, су бұруға – 17,3 пайыз, ыстық суға – 14,5 пайыз, тарату желілері бойынша тасымалданатын газға – 13,2 пайыз, қоқыс шығаруға 11,1 пайыз жоғарылады. Теміржол жолаушылар көлігінің қызметтері – 20 пайыз, ұялы байланыс қызметтері – 19,5 пайыз, медициналық зертханалар мен рентген кабинеттерінің қызметтері – 18,4 пайыз, сәлемдемелер жіберу – 17,7 пайыз, дәрігерге алғашқы қаралу қызметі 15,5 пайыз қымбаттады".

Ноутбуктің бағасы – 67,2 пайыз, ас үй пеші – 55,4 пайыз, сымсыз құлаққаптар – 47,7 пайыз, планшет 46,8 пайыз қымбаттаған. Бағаның өсуі корвалолға – 33,2 пайыз, канефронға 26,9 пайыз байқалды. Азық-түлік ішінде картоп – 62,1 пайыз, пияз – 27,3 пайыз, қырыққабат – 20,2 пайыз, сарымсақ – 18,3 пайыз, қызылша 15,2 пайыз қымбаттаған. Керісінше, қарақұмық жармасы жылдық мәнде – 20,4 пайыз, сәбіз – 6,6 пайыз, күріш – 5,7 пайыз, жұмыртқа 5,3 пайыз арзандаған.

Инфляция деңгейін сипаттайтын тұтыну бағалары индексінің көрсеткіші ай сайын есептеледі. Бақылаулар қызметтер мен тауарлардың тарифтері мен бағалары – барлығы 508 позиция бойынша жүргізіледі. Инфляция бойынша динамикалық өзгерістерді 2018 жылдан бастап көрсеткіштер қамтылған арнайы әзірленген интерактивті дашбордта көруге болады.

Сілтемесіз жаңалық оқисыз ба? Онда Telegram желісінде парақшамызға тіркеліңіз!