Қазақстандық балаларға Ұлттық қордан 129 доллар түсті

Қазақстан Ұлттық банкі "Ұлттық қор - балаларға" бағдарламасы бойынша 18 жасқа дейінгі балалардың Бірыңғай жинақтаушы зейнетақы қорындағы (БЖЗҚ) шоттарына кезекті қаржы аударылатынын мәлімдеді, - деп хабарлайды Tengrinews.kz тілшісі.

Бағдарлама аясында әр балаға 129,38 АҚШ доллары (қазіргі курспен 66 673 теңге) бөлінді. Барлық қатысушыға төленген жалпы сома - 888,8 миллион АҚШ доллары. 2024 жылдың аяғында бағдарламаға қатысушы бала саны 6 921 035 болды.

Балаларыңыздың шотындағы қаражаттың бар-жоғын kids.enpf.kz сайтында баланың ЖСН-ін енгізу арқылы тексеруге болады.

kids.enpf.kz

Еске салайық, "Ұлттық қор - балаларға" бағдарламасы аясындағы алғашқы төлемдер 2024 жылы жүргізілген еді. Ол кезде әр балаға 100,52 АҚШ доллары бөлінген. Бұл қаражат - Қазақстан Республикасы Үкіметінің 18 жасқа толмаған балаларға аударатын міндеттемесі.

Жыл сайынғы аударым мөлшері Ұлттық қордың шетел валютасындағы активтеріне және оның ұзақмерзімді инвестициялық табысына байланысты болады. Қаражаттың жартысы осы табыстан бөлінеді. Сонымен қатар балалардың шотына аударылған қаражат Ұлттық қордың инвестициялық портфелінде сақталып, қосымша табыс әкеледі.

Бағдарлама іске қосылған екі жыл ішінде әр балаға жалпы 232,94 АҚШ доллары жинақталды. 2025 жылғы 31 қаңтарда осы ақпаратты eGov mobile мобильді қосымшасынан және kids.enpf.kz сайтынан алуға болады.

Сілтемесіз жаңалық оқисыз ба? Онда Telegram желісінде парақшамызға тіркеліңіз!