Мусин Тоқаев вице-министрлерді не үшін сынағанын айтты

Цифрлық даму, инновациялар және аэроғарыш өнеркәсібі министрі Бағдат Мусин Қасым-Жомарт Тоқаевтың цифрландыруға жауапты вице-министрлердің жұмысын неге сынағанын айтты, - деп хабарлайды Tengrinews.kz тілшісі.

Мусин цифрландыру жөніндегі вице-министрлер "кейбір ведомстволарда ақпараттық технологиялар жөніндегі вице-министрлерге айналғанын" атап өтті. 

"Егер басшылықта интернетпен бірдеңе дұрыс болмаса, қамтамасыз ету цифрландыру жөніндегі вице-министрге жүктелді", - деп атап өтті Бағдат Мусин ОКҚ брифингінде журналистердің сұрақтарына жауап ретінде.

Ол цифрландыру жөніндегі вице-министрлер сандық түрлендіруді дамытумен айналысу керек екенін атап өтті. Бұл ретте, Қаржы министрлігі басшысының айтуынша, сандық түрлендіру процестерін автоматтандырудан ажырату қажет.

"Автоматтандыру мен сандық түрлендірудің айырмашылығын түсіндірейін. Бізге әдістемелік тапсырмалар берілгенде, автоматтандырумен айналыстық. Мысалы, жер қойнауын пайдалану лицензиясын немесе құқығын беру. Бұл құқық заңнамалық актілерде және нұсқаулықтарда көрсетілген. Жетекшілік ететін салалық вице-министр немесе салалық департамент оны автоматтандыру керек деп санайды, содан кейін IT мамандар осы процестерді автоматтандырды. Біз қолданыстағы нормативтік-құқықтық актілерді негізге алып, бизнес-процестерді автоматтандырумен айналыстық", - деді Мусин.

Сонымен қатар, министр автоматтандыру қолданыстағы процестерді жолға қою екенін атап өтті. Сандық түрлендіру - қолданыстағы процестерді толық қайта қарау.

"Мысалы, былтыр ХҚКО-ларда халықтың көп екенін көрдік. Сол жерде жағдайды түзетуге, процестерді автоматтандыруға болатын еді. Бірақ біз сол жерге барып, бұл мүмкін емес екенін түсіндік, онлайн режимге көшіру керек. Екінші деңгейлі банктермен бірге автокөлік сатудың онлайн-сервисін, автокөлікті онлайн-тіркеуді жасадық. Бұл - сандық түрлендіру.

Сол кезде ЭЦҚ, интернет, деректер базасы және биометрия бар екенін түсіндік. Онда келіп жүрудің не керегі бар? Ішкі істер министрлігі ұсыныс тастап, тез іске асырдық. Қазір автокөліктердің 36 пайызы онлайн түрде қайта рәсімделеді, халық ХҚКО-ға бармайды. Енді кез келген процесті қайта ойластыру керек. Міне, сандық түрлендіру жөніндегі вице-министрлер әрбір процесті автоматтандырып қана қоймай, қайта қарайтын болады", - деп түсіндірді Мусин.

Сандық түрлендірудің тағы бір мысалы ретінде министр мүгедектікті тағайындау рәсімін қайта қарауды атады. Мысалы, бұрын адамдар мүгедектік тағайындалып, жәрдемақы алу үшін төрт орынға баруы керек еді. Оның айтуынша, еңбек және халықты әлеуметтік қорғау вице-министрімен бірге бұл процесс толығымен қайта қаралды.

"Адам емханаға бір рет қана барады, медицина қызметкері бәрін деректер базасына енгізеді, ары қарай бәрі онлайн өтеді, сондай-ақ, қарым-қатынас СМС немесе қосымша арқылы жүргізіледі.

Сандық түрлендіру - барлық процесті қайта қарау. Қасым-Жомарт Кемелұлы цифрландыру жөніндегі әрбір вице-министрдің салаға терең үңіліп, түрлендіруін және қазіргі ахуалды сыбайлас жемқорлық көріністерін өзгертуге көмектесетін жаңалықтарды ұсынуын да күтеді", - деді Мусин.

Еске салайық, Президент Қасым-Жомарт Тоқаев цифрландыруға жауапты вице-министрлер жұмысын сынға алған. Мемлекет басшысының айтуынша, олардың басты міндеті - күнделікті бюрократиялық жұмыс емес, цифрлық реформалар мен өзгерістерді жүзеге асыру.

Сілтемесіз жаңалық оқисыз ба? Онда Telegram желісінде парақшамызға тіркеліңіз!