Неге автокөлік фарасына LED-шам орнатуға болмайды?

ІІІМ Қазақстандағы көліктердің сыртқы жарықтандыру құрылғыларына қойылатын қазіргі талаптарды түсіндірді. Министрлік LED-фаралар туралы сұрақтарға жауап берді, - деп хабарлайды Tengrinews.kz тілшісі.

Ішкі істер министрлігі көліктердің сыртқы жарықтандыру құрылғыларының саны, түрі, түсі, орналасқан жері және жұмыс режимі көлік құралының дизайны талаптарына сәйкес келмесе, көліктерді пайдалануға тыйым салынатынын еске салды.

"Өндірісі тоқтаған көліктерде басқа маркалар мен модельдердегі көліктердің сыртқы жарықтандыру құрылғыларын орнатуға рұқсат етіледі. Осыған байланысты, егер көлік құралының дизайнында жарықдиодты фаралар қарастырылған болса және оның зауыттық жабдықтарына сәйкес келсе, онда оларды ұқсастарына ауыстыру керек. Бұл жағдайда галоген жарық көздерін жарықдиодты фараларға ауыстыруға жол берілмейді", - делінген министрліктің Tengrinews.kz редакциясы ресми сауалына берген жауабында.

Полиция күн сайын автомобильдердің жарықтандыру құрылғылары мен жарық дабылдарын заңсыз орнату және ауыстыру фактілерін анықтап, жолын кеседі. Жыл басынан бері рұқсатсыз қайта жабдықталған көлік құралын басқарғаны үшін Әкімшілік құқық бұзушылық туралы кодекстің (ӘҚБтК) 590-бабы бойынша 16 мыңнан аса жүргізуші жауапкершілікке тартылған. Олардың қаншасына тікелей LED-фаралар үшін айыппұл салынғанын айту қиын. Өйткені ІІМ конверсия түрлері бойынша әкімшілік заңбұзушылықтар туралы статистиканы жүргізбейтіні белгілі болды.

"ӘҚБтК-нің 590-бабында (1, 5, 6, 7, 8, 9 және 10-бөліктерінде) көрсетілген заңбұзушылықтар жасалған кезде орган қызметкерлері пайдалануға тыйым салу себептері жойылғанға дейін көлік құралдарын пайдалануға тыйым салуға және мемлекеттік тіркеу нөмір белгілерін алуға құқылы", - деп толықтырды ІІМ.

Сілтемесіз жаңалық оқисыз ба? Онда Telegram желісінде парақшамызға тіркеліңіз!