ОҚО-да зорлық құрбаны болған 13 жастағы қыз мектептен қуылып жатыр

Оңтүстік Қазақстан облысында зорлық құрбаны болған 13 жастағы оқушы қыз мектептен қуылып жатыр. Бұл туралы қыздың шешесі журналистер мен қоғам белсенділеріне айтып берді, - деп хабарлайды Tengrinews.kz тілшісі.

Қыздың шешесінің айтуынша, Ордабасы ауданында тұратын жасөспірім зорлық құрбаны болған. Осыдан кейін оған аудандық мектепте оқуға мүмкіндік бермей, кейін Шымкенттегі интернаттан де қуып жатыр екен. 

"Мұның алдында ауданда білім бөлімінің мамандары қызымның олардан, жергілікті әкімдіктен көмек алғаны және ешқандай да шағымым жоқ екені жайлы қолхат жазып беруге мәжбүрледі. Қызымды мектептен шығарып алуыма тура келді. Енді міне, шымкенттік мектептен де құжаттарын алып кетсін деп жатыр", - дейді қыздың анасы.

Заңгер Айгүл Орынбектің айтуынша, мұғалімдер зорлық құрбаны болған қызбен жұмыс істеуден қауіптеніп отыр. Ол қыздың анасына интернаттан құжаттарын алып, жаңа мектепке орналасуына қолғабыс етіп жатыр.