21 қыркүйек 2024 | 09:38

Павлодар облысында мүмкіндігі шектеулі жан үй кезегінен заңсыз шығарылған

Фото: elements.envato.com

Павлодар облысында мүмкіндігі шектеулі жан үй кезегінен заңсыз шығарылған, - деп хабарлайды Tengrinews.kz тілшісі.

"Павлодар облысының мүмкіндігі шектеулі тұрғыны (көру қабілеті бойынша 1-топтағы) 2006 жылы коммуналдық тұрғын үй қорынан тұрғын үй алу үшін кезекке тұрған. Бірақ 18 жылдан кейін, 2024 жылы оны мониторинг анықтаған күйеуінің жылжымайтын мүлікке меншік құқығы тіркелуіне байланысты бұл кезектен шығарып тастаған. Тіркеуге алынған сәттен бастап, оның тұрғын үйінің бар-жоғы туралы қалалық тұрғын үй қомиссиясы бірнеше рет тексерген", - делінген Жоғарғы сот хабарламасында.

Әйел коммуналдық тұрғын үй қорынан өзін тұрғын үйге мұқтаждар тізімінен шығару туралы шешімді заңсыз деп тану және тұрғын үй кезегін қалпына келтіру туралы талап қойып, сотқа жүгінді. Талап қоюын оның пәтер иесі еместігімен, бұл пәтерде тұруға жағдайдың жоқтығымен, орталықтандырылған жылу немесе кәріз жүйесі болмауымен, пәтер жөндеуді қажет ететіндігімен түсіндірді.

Бірінші сатыдағы сот талап қоюды қанағаттандырудан бас тартты. Апелляция істі қарай келе, талап қоюшының күйеуінің жалпы ауданы 44 шаршы метр, екі бөлмелі пәтері 4 адамнан тұратын отбасының тұруына жеткіліксіз екендігін ескерді.

"Тұрғын үй қатынастары туралы" заңның 69-бабының 4-тармағына сәйкес тұрып жатқан тұрғынжайы белгіленген санитарлық және техникалық талаптарға сай келмесе азаматтар тұрғын үйге мұқтаж деп танылады. 2011 жылғы әлеуметтік-тұрмыстық жағдайды тексеру актісі бойынша үйде су мен жылу жоқ, кәріз жүйесі жұмыс істемейтіні анықталды. Яғни бұл тұрғын үй тұрмыс жағдайына сай емес.

Сот талап қоюшыны коммуналдық тұрғын үй қорынан тұрғын үйге мұқтаж деп таныды және әкімшілік органның сенімгерлік құқығын қорғау қағидасын бұзуы анықталды (әкімшілік процеске қатысушының әкімшілік органның қызметіне сенімі, ӘРПК-тің 13-бабы). ӘРПК-нің 12 және 14-баптарына сәйкес, әкімшілік органға, лауазымды адамға әкімшілік процеске қатысушының құқығын жүзеге асырудан бас тартуға, шектеуге немесе тоқтатуға, сондай-ақ оған белгіленбеген талаптарды сақтау міндетін жүктеуге тыйым салынады. Әкiмшiлiк рәсiмдер туралы заңнаманың барлық күмәндерi, қайшылықтары мен түсiнiксiздiктерi әкiмшiлiк рәсiмге қатысушының пайдасына шешілді.

Заңдылық, пропорционалдылық, сенім құқығын қорғау, құқықтардың басымдығы қағидаттарын ескере отырып, әділдік пен парасаттылық өлшем шарттарына сүйене отырып, әйелдің талап-арызы толық көлемде қанағаттандырылды. Апелляциялық қаулы заңды күшіне енді.

Сілтемесіз жаңалық оқисыз ба? Онда Telegram желісінде парақшамызға тіркеліңіз!