Перизат Қайраттың Mercedes көлігі полицияға берілді: жаңа дерек

Бұған дейін Перизат Қайратқа тиесілі болған және аукционға шығарылған қымбат Mercedes көлігі Астана полициясына берілді. Жағдайды Tengrinews.kz тілшісі анықтап көрді.

Көлік неге сатылмады?

Астана қаласының мемлекеттік мүлік және жекешелендіру департаменті редакцияның сауалына берген жауабында сатылымға дейін мүлік міндетті түрде алдымен веб-портал арқылы мемлекеттік заңды тұлғаларға ұсынылатынын хабарлады. Тек осы кезеңде өзгеге берілмеген жағдайда ғана ол басқа тәсілмен өткізілуі мүмкін.

Перизат Қайраттың көлігіне қатысты жағдайда сатудан көрі мемлекеттік органға беруге басымдық берілді.

Өтінімдерді қарау қорытындысы бойынша, 2026 жылғы 7 сәуірдегі хаттамаға сәйкес, Астана Полиция департаменті сауда-саттық жеңімпазы болып саналды.

Енді 15 жұмыс күні ішінде шешім ресми түрде ресімделіп, бұл мүлік ведомство теңгеріміне бекітілуі, яғни полицияның пайдалануына берілуге тиіс.

Осылайша, Mercedes-Benz S 450 елордалық департаменттің иелігіне өтті.

Автокөлікке салынған тыйым және сот тарихы

Еске сала кетейік, аукцион кезеңінде-ақ лоттың сипаттамасында көлікке тыйым салынғаны туралы хабарланған болатын. Бұл шешім Астана қаласының мамандандырылған ауданаралық тергеу сотының 2024 жылғы 19 қарашадағы қаулысымен санкцияланған.

sauda.e-qazyna.kz сайтынан скриншот

Кейін, 2025 жылғы 25 шілдеде елорданың қылмыстық істер жөніндегі ауданаралық соты Перизат Қайраттың ісі бойынша үкім шығарды, оның аясында мүлікті тәркілеу мүмкіндігіне байланысты шараларды сақтау мәселелері де қаралды.

"Қылмыстық-процестік заңнамаға сәйкес, мүлікке салынған тыйымды алу немесе қалдыру мәселелерін сот үкімді орындау кезінде шешеді", - деп хабарлады ведомство.

Көліктің жай-күйі

2026 жылғы 18 наурыздағы бағалау есебіне сәйкес, автокөліктің техникалық жағдайы жақсы.

"Құжатта жөндеу қажеттілігі туралы қосымша ақпарат көрсетілмеген", - деп түсіндірді департамент өкілдері.

Люкс санатты көліктің нақты қандай мақсатта пайдаланылатыны туралы нақты жауап берілмеді. Сонымен қатар департамент мүлік мемлекеттік органға берілгеннен кейін оны әрі қарай пайдалану тәртібі қолданыстағы ережелер мен уәкілетті органдардың шешімдері аясында айқындалатынын атап өтті.

Сондай-ақ департамент мұндай әкімшілік шешімдерге белгіленген тәртіппен шағым түсіруге болатынын еске салды.

Қайраттан тағы не тәркіленді?

2025 жылдың қыркүйегінде Қаржылық мониторинг агенттігі Перизат Қайраттан тәркіленген мүліктің аукционға шығарылатынын хабарлады.

Бұл жерде активтердің үлкен жиынтығы туралы сөз болып отыр: Vela Village коттедж қалашығындағы жеке үй, Akbulak Riviera, Sensata Plaza, Highvill Ishim Gold және "Көк Жайлау" тұрғын үй кешендеріндегі бірнеше пәтер мен тұрақ орындары.

Сондай-ақ 2024 жылы шыққан Mercedes-Benz S450 көлігін қоса алғанда, Lexus LX 600, Mercedes-Benz EQE и Haval H6 GT секілді қымбат автокөліктер тәркіленген. Одан бөлек гүл кәсібіндегі 100 пайыздық үлесі мен қолма-қол 22 мың АҚШ доллары мемлекетке берілген.

Тәркіленген заттардың арасында брендтік бұйымдар да бар: әлемге әйгілі маркалардың күннен қорғайтын көзілдіріктері, аяқ киімдері мен аксессуарлары.

Перизат Қайраттың ісі

Перизат Қайрат - қазақстандық қоғам қайраткері және кәсіпкер. Үш жыл бойы ол Biz Birgemiz Qazaqstan 2030 қайырымдылық қорын басқарған.

2024 жылдың қарашасында Қайрат 1,5 миллиард теңге жымқырды деген күдікпен ұсталды. Бұл қаражат су тасқынынан зардап шеккендерге көмек ретінде жиналғаны айтылды. Бірақ тергеу нұсқасы бойынша, қаражаттың бір бөлігі Қайраттың жеке шығындарына - элиталық жылжымайтын мүлік, автокөліктер мен саяхаттарға жұмсалған.

Қор қаражатын қолма-қол ақшаға айналдыру үшін Қайрат туыстарын тартқан. Іс бойынша оның анасы Ғайни Алашбаева да сыбайлас ретінде өткен.

2025 жылдың наурызында оның Biz Birgemiz Qazaqstan 2030 қоры сот шешімімен жойылды.

16 шілдеде іс бойынша жәбірленушілер сотқа әлеуметтік желідегі жарнамаға сеніп, қайырымдылық көмек көрсетуге шешім қабылдағандарын айтты. Сондай-ақ сотта тергеу амалдары барысында тәркіленген мүліктің тізімі оқылды.

Нәтижесінде Перизат Қайрат 10 жылға бас бостандығынан айырылды. Оның анасы Гайни Алашбаева 7 жылға сотталды.