Полиция Талдықорғандағы Назарбаев зияткерлік мектебіндегі жаппай улану оқиғасын тексеріп жатыр

Талдықорғандағы Назарбаев зияткерлік мектебінде уланып, ауруханаға түскендер саны 23-ке жетті, - деп хабарлайды Tengrinews.kz тілшісі Алматы облыстық денсаулық сақтау басқармасының өкілдеріне сілтеме жасап. Осы дерекке қатысты Талдықорған ІІБ қылмыстық іс қозғады.

Қалалық қоғамдық денсаулықты қорғау басқармасының басшысы Ермек Әсемқұловтың айтуынша, бірінші науқас 9 сынып оқушысы Ислам Қаханалидің дене қызуы көтеріліп, диарея пайда болып қалалық жұқпалы ауруханасына 20 сәуірде жеткізілген. Оған "ауыр гастроэнтероколит" диагнозы қойылды. Екі сағат өткеннен кейінтағы сегіз оқушы ауруханаға түсті. Келесі күні жедел жәрдем көлігі тағы алты баланы ауруханаға жеткізді. Олардың ішінде бесеуі жатақханада тұрады. 

"Ауруханаға түскендердің көбісі 7-11-ші сынып оқушылары, олардың барлығында дерлік ішек ауруы: дене қызуы жоғарылаған, диарея, құсу, жүрегі айну, басы айналу және әлсіздік, - деп түсіндірді Ермек Әсемқұлов. - Бүгінде балалардың жағдайы тұрақты, қауіп-қатер жоқ. Олардың жақсарып келе жатқанын байқауға болады. 

Төтенше жағдай болған күні мектепте кешендік санитарлы-эпидемиологиялық тексеріс жүргізілді. 725 адам тексерілді, оның 644-ті оқушы.