+7 (777) 001 44 99
Қазақша
Русский
English
29 тамыз 2023 | 09:21
Премьер-министрге қазақстандық полицейлердің жаңа видеожетондары көрсетілді
Премьер-министр Әлихан Смайылов Ішкі істер министрлігінде болып, қылмыстың алдын алу мен оларды ашуда заманауи технологияларды қолдану, жалпы полиция жұмысын цифрландыру барысымен және жаңа оқу жылы қарсаңында мектептердегі қауіпсіздікті қамтамасыз ету шараларымен танысты, - деп хабарлайды Tengrinews.kz тілшісі Үкіметтің баспасөз қызметіне сілтеме жасап.
ПОДЕЛИТЬСЯ
Премьер-министр Әлихан Смайылов Ішкі істер министрлігінде болып, қылмыстың алдын алу мен оларды ашуда заманауи технологияларды қолдану, жалпы полиция жұмысын цифрландыру барысымен және жаңа оқу жылы қарсаңында мектептердегі қауіпсіздікті қамтамасыз ету шараларымен танысты, - деп хабарлайды Tengrinews.kz тілшісі Үкіметтің баспасөз қызметіне сілтеме жасап.
Ведомство басшысы Марат Ахметжанов полицияның күнделікті қызметінде заманауи технологияларды кеңінен қолдану – Мемлекет басшысының ішкі істер органдарының алдына қойған басты міндеттердің бірі екенін атап өтті.
Атап айтқанда, Ішкі істер министрлігі республикадағы қалалардың көшелері мен қоғамдық орындарында "толық қамту" принципімен бейнебақылаулар енгізуде. Жыл басынан бері полицияның жедел басқару орталықтарындағы (ЖБО) бейнекамералар арқылы 6 мың қылмыс ашылды, 2,7 миллион жол ережесін бұзу, сондай-ақ 312 мың басқа да әкімшілік құқық бұзушылық анықталды. Нәтижесінде, биыл еліміздегі қылмыс көрсеткіші 17 пайызға төмендеген.
"Цифрландыру арқылы тиісті мемлекеттік қызметтер жұмысының тиімділігін арттыруға болатынына талай рет көзіміз жетті. Нәтижесінде, еңбек өнімділігі артып, жемқорлық фактілері азаюда. Цифрлық технологияларды енгізу арқылы Ішкі істер министрлігі де жақсы нәтижелерге қол жеткізіп отыр. Енді мұны аймақтарда одан әрі кезең-кезеңімен жүзеге асыру қажет", - деді Әлихан Смайылов.
Бұдан бөлек, Үкімет басшысы мектептердегі қауіпсіздікті қамтамасыз ету жұмыстарымен танысты. Атап айтқанда, оқу орындарында орнатылған бейнекамералардағы жазбалар мен дабыл түймешелерінің сигналдарын жедел басқару орталықтарына және полицияның кезекші бөлімшелеріне шығару барысы көрсетілді. Бүгінде мұндай шаралармен 3 654 мектеп қамтылған, бейнебақылау камералары 7 600 мектепте орнатылған. Оларды қосу жұмыстары жалғасып жатыр.
Сонымен қатар, ішкі істер органдарының мекемелері де жаппай бейнебақылаумен қамтылған. Барлығы 18 мың камера орнатылған. Бұл қызметкерлердің және жұмыс процесіне басқа да қатысушылардың іс-әрекетін бақылауға мүмкіндік береді. Дәл осындай жұмыстар қылмыстық-атқару жүйесі мекемелерінде де жүргізілуде. Атап айтқанда, 52 колонияға 22 мың бейнекамера орнатылған. Бейнебақылауды Қылмыстық-атқару жүйесі комитетінің ситуациялық орталығы мен прокуратура органдары жүргізеді.
Бұдан бөлек, Үкімет басшысы "Цифрлық полицей" жобасы аясында сатып алынған жаңа бейнежетондардың жұмысын бағалады. Құрылғы видеоны басшылар мен басқа да тексерушілердің жұмыс орындарына онлайн режимде трансляциялайды. Бейнежетондарға орнатылған бағдарлама полиция қызметкеріне бейнежазбаларды өз бетінше жоюға, құрылғыны өшіруге немесе өзінің отырған жерін жасыруға мүмкіндік бермейді.
Сондай-ақ, премьер-министрге полицияға жол ережесін бұзғандарды анықтауға көмектесетін "Қорғау" жүйесінің ерекшеліктері туралы баяндалды. Бағдарлама көше камераларынан алынған деректерді талдай отырып, жақын маңдағы полиция қызметкерінің планшетіне қауіпті жүргізушінің келе жатқаны туралы сигнал береді. Бұл жол қозғалысы ережелерін қасақана бұзушы, я жоғары жылдамдықпен келе жатқан көлік жүргізушісі де болуы мүмкін.
Әлихан Смайылов тұрмыстық зорлық-зомбылық үшін жауапкершілікті күшейту шараларын жүзеге асыру барысымен, көші-қон саласындағы мемлекеттік қызметтерді көрсету жұмыстарының нәтижесімен және CyberPol интернет-алаяқтықпен күрес жөніндегі жобамен танысты. Атап айтқанда, полиция байланыс операторларымен бірлесе отырып, жалған нөмірлерден келетін қоңырауларға техникалық тосқауыл қояды, нәтижесінде, бүгінгі күні алаяқтардың 36,5 миллион қоңырауына тосқауыл қойылды.
Есірткі қылмысымен күрес бойынша, биыл құқық қорғау және арнайы органдар 14 тоннадан астам есірткі тәркіледі, оның ішінде 71 келіден астамы героин және 652 келісі "синтетика". Құны 24 млрд теңге болатын 4,7 миллион бір реттік доза айналымға жіберілмеді. 52 есірткі зертханасы жойылды. Сондай-ақ 85 тонна прекурсор тәркіленіп, нәтижесінде 20 миллион бір реттік "синтетика" өндірісіне тосқауыл қойылды. 2,5 мың есірткі сайты бұғатталды.
Сонымен қатар, кадрлық процестерді автоматтандыру қорытындысы, жедел-қызмет, қоғамдық тәртіпті қамтамасыз ету және жалпы құқық бұзушылықтың алдын алу бойынша өзекті мәселелер қаралды.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
Показать комментарии
Читайте также
