Шәкіртақы, тұрғын үй және жол ақысы: қазақстандықтарға мемлекеттік бағдарлама туралы айтылды

Еңбек және халықты әлеуметтік қорғау министрлігі қазақстандықтарға жұмыссыздардың жаңа мамандықты тегін меңгеруіне немесе біліктілігін арттыруына мүмкіндік беретін мемлекеттік бағдарлама туралы еске салды, деп хабарлайды Tengrinews.kz.

Бағдарлама туралы

Ведомство бағдарламасы бойынша оқу алты айға дейін созылады. Осы уақыт ішінде қатысушылар кәсіп меңгерумен қатар келесі төлемдерді алады:

• 43 574 теңге көлемінде шәкіртақы;
• жол ақысының өтемақысы – 17 300 теңге;
• тұрғын үй ақысы – 64 875 теңгеге дейін.

Сонымен қатар мемлекет міндетті медициналық тексеруден өту шығындарын да өз мойнына алады.

Жаңа кәсіпті тікелей жұмыс берушінің өндіріс орнында да меңгеруге болады. Бұл жағдайда бағдарлама қатысушыларына еңбекақы төленеді. 2026 жылы 86 500 теңге.

Қашықтан оқуды жөн көретіндер үшін Skills.enbek.kz порталында онлайн-сабақтар қолжетімді.

Еңбек министрлігінің мәліметінше, жыл басынан бері бағдарлама бойынша 37 мыңнан астам жұмыссыз қазақстандық оқудан өткен.

Қалай қатысуға болады?

Тегін қысқа мерзімді кәсіптік оқудан өту үшін Электрондық еңбек биржасында (ЭЕБ) тіркелу немесе тұрғылықты жері бойынша Халықты жұмыспен қамту орталығына жүгіну қажет.

Бұдан кейін порталдағы жеке кабинетте кәсіптік оқыту бөлімін ашып, сұранысқа ие мамандықтар тізімімен танысып, курсты таңдау керек (мысалы, аспаз, тігінші, электр-газ дәнекерлеуші, бухгалтер және т.б.).

Содан соң онлайн-өтінімді толтырып, оған электрондық цифрлық қолтаңба (ЭЦҚ) арқылы қол қою қажет.