+7 (777) 001 44 99
Қазақша
Русский
English
04 қыркүйек 2019 | 09:36
Шымкентте оқушылар моншада оқып жатыр
Шымкентте мектеп оқушылары моншада оқуға мәжбүр. Нұрсәт шағын ауданының бастауыш сынып балғындары бүгін екінші күн қоғамдық жуыну орны болған нысанда білім алып жатыр, - деп хабарлайды Тengrinews.kz тілшісі.
ПОДЕЛИТЬСЯ
Шымкентте мектеп оқушылары моншада оқуға мәжбүр. Нұрсәт шағын ауданының бастауыш сынып балғындары бүгін екінші күн қоғамдық жуыну орны болған нысанда білім алып жатыр, - деп хабарлайды Тengrinews.kz тілшісі.
Бұған шамданған бірлі-жарым ата-ана баласын алып кеткен. Шымкенттегі мыңнан аса бастауыш сынып оқушысы моншада сабақ бастады. Қоғамдық орындағы жуынатын бөлмелер сыныптарға айналған. Бәрі сырланып, мектепке ыңғайластырылыпты. Бөтен иіс те сезілмейді. Бірақ өздері талай жуынған орында баласы оқып жатқанын тұрғылықты жұрттың бірі құптағанымен, бірі наразы.
№ 80 мектеп-лицейің директоры Сәуле Қалыбекованың айтуынша, оқу ордасында 4350 бала бар. 1200 орындық ғимаратқа сыйысуға мәжбүрміз дейді мектеп басшысы. Директор ауданда бала саны көптігін айтады. Бірінші сыныптың өзі - 20. Үш ауысымда оқымас үшін ғимарат жалдауға тура келгенін көлденең тартты. Мыңнан астам бала оқитын ғимараттың жалдау ақысы - 2 миллион 800 мың теңге, ол жергілікті бюджеттен төленеді. Ал монша Нұрсәттегі жалғыз бос ғимарат көрінеді. Айтуынша, оған санэпидемиологтар да қарсы емес.
"Моншаның алдында бұл жер кәсіпкерлердің кеңсесі болған. Содан соң бір жылдан астам монша болған. Содан екі жылға жуық бос тұрған ғимарат еді. СЭҚ бізге кішкене кемшіліктерді айтты. Иә, бізге оқуға болады деді. Олар ғимараттың ылғалдылығын, биіктігін тексерді. Өздерінің ережесі бойынша сәйкестігін тексерді", - деді Сәуле Қалыбекова.
Директордың сөзінше, моншада әлі жөнделіп үлгермеген бөлмелер бар. Толық аяқталса, мұнда 1,5 мың бала оқи алады. Тек санэпидемиологтардың ескертпе талаптарын орындап үлгерулері тиіс екен. Соның бірі - сынып бөлмелерінің әрбіріне қол жуатын орынның болуы.
Айта кетейік, Шымкентте 19 мектеп үш ауысымда бала оқытып отыр. Биыл 5 мектеп қолданысқа берілгенімен, үш ауысым мәселесі бұрынғыша қалып тұр. Білім басқармасындағылар туындаған қиындық ата-аналарға мектеп таңдауға еркіндік берілгенімен байланыстырып отыр.
Показать комментарии
Читайте также
