СҚО мұрағатының бірегей құжаттары Астанада көпшілік назарына ұсынылады

Астанада Солтүстік Қазақстан мемлекеттік мұрағатының қорынан сирек құжаттар мен фотоматериалдар көпшілік назарына ұсынылды, - деп хабарлайды Tengrinews.kz тілшісі 24Хабар сайтына сілтеме жасап.

Экспозиция Қазақстанның Тәуелсіздігінің 25 жылдығына арналған және СҚО-ның Астанадағы күндері аясында өтеді. "Кладезь Севера: история в уникальных архивных документах" деп аталатын көрме 7 бөлімнен тұрады. Экспозицияда Абылай ханның қызметі жайлы құжаттар, революцияға дейінгі Петропавл, Солтүстік Қазақстан облысының құрылуы және тың игеру туралы материалдар ұсынылады. Қазақстан Республикасының тәуелсіздік жылдарында облыстың дамуына жеке бөлім арналып отыр.

Сонымен қатар көрмеге мұрағат жарияланымдары, соның ішінде құжаттар мен материалдар жинақтары, атлас карталар мен өмірбаяндық анықтамалар қойылады. Көрмеге шығарылған құжаттар мен фотосуреттер аса маңызды болып есептеледі. Олардың басты құндылығы - елімізде орын алған қандай да болмасын оқиғаның тарихымен танысуға мүмкіндік беретіндігінде.