Шығыс Қазақстан облысын су басу қаупі бар

Шығыс Қазақстан облысында қызыл судан қауіп сейілген жоқ, - деп хабарлайды "Астана" телеарнасы.

Қытай тарапы су жіберсе, Қара Ертістің де деңгейі көтерілуі мүмкін екені айтылады. Сала мамандарының айтуынша, Ертіс өзенін шекара бойында қолдану жөнінде келісімшарт жоқ.

Телеарнадағылардың мәліметінше, қазір көрші ел қаупсіздік үшін қызыл суды Қара Ертіске ағызып жатыр. Қазгидромет өкілдерінің сөзіне қарағанда, дамбадан өтіп жатқан судың көлемі секундына 1400 текше метрден асса, онда Ертіс арнасынан асуы мүмкін.

"Егер қытайлықтар секундына 1400 текше метр су жіберсе, онда олар бізді ақпараттандырып, біз Төтенше жағдай комитетімен бірге әрекет жасаймыз. Судың көлемі 1400 текше метрге дейін жетпейінше, Қытай тарапы бізге есеп бермейді", - дейді "Қазгидрометтің" ШҚО бойынша филиалының директоры Медет Еркінбеков.