Таразда әйел пәтерін әпкесіне беріп, 20 жылдан кейін қайтарып алмақ болған. Сот шешімі

Жамбыл облысының соты апалы-сіңілілер арасындағы дауға нүкте қойды. Дау пәтерге қатысты болған, - деп хабарлайды Tengrinews.kz тілшісі соттың баспасөз қызметіне сілтеме жасап.

Мән-жайы

Орта мектептің мұғалімі 2003 жылғы жекешелендіру шарты бойынша пәтердің иесі екенін көрсетіп, туған әпкесінің жеті адамнан тұратын отбасын, оның ішінде кәмелетке толмаған балаларын пәтерден шығаруды сұраған талаппен сотқа жүгінген.

Қарсы талапта жауапкер әпкесімен (талап қоюшымен) жасалған келісім және тұрғын үйге билік ету туралы нотариалды куәландырылған сенімхат негізінде онда отбасымен 23 жылдан астам тұрғанын атап көрсеткен. Осы уақыттың бәрінде – 2002 жылдан бері – жауапкердің отбасы пәтерді ұстау шығындарын өз мойнына алып, күрделі жөндеулер жасап, онда үздіксіз тұрып келген.

Сотта не анықталды?

Сот талқылауы барысында, жауапкердің және оның отбасының ұзақ уақыт тұру дерегін растайтын көрші куәлардың айғақтары тыңдалды. Коммуналдық төлемдерді және даулы пәтерді ұстауды растайтын құжаттар зерттелді. Талап қоюшының өзі бұған дейін сенімхаттар, оның ішінде даулы мүлікті сатуға сенімхат берген.

Істі зерттей келе, кәмелетке толмағандардың істері жөніндегі мамандандырылған ауданаралық соты жауапкердің іс-әрекетінде АК-нің 240-бабында көзделген барлық белгілер бар: адалдық, ашықтық және жылжымайтын мүлікке 7 жылдан астам уақыт меншік құқығында меншік құқығының үздіксіздігі деген қорытындыға келген.

Сот шешімі

Осыған орай, сот пәтерден шығару туралы талап қоюды қанағаттандырудан бас тартып, жауапкердің пәтерге меншік құқығын мойындап, қарсы талап қоюын қанағаттандырды.

Бұл шешімге талап қоюшы апелляциялық тәртіпте шағым түсірген. Алайда бірінші сатыдағы соттың шешімі өзгеріссіз қалдырылды, сот актілері заңды күшіне енді.

Сілтемесіз жаңалық оқисыз ба? Онда Telegram желісінде парақшамызға тіркеліңіз!