Қазақстандық Ninety One тобының әні түрік чартында бірінші орын алды

Қазақстандық Ninety One тобының "Қайтадан" деп аталатын жаңа синглы TMB телеарнасының түрік чартында бірінші орын алды, - деп хабарлайды Tengrinews.kz тілшісі. TMB (Turkish Music Box) шығыс музыкасының жаңа хиттерін тарататын телеарна. 

Айта кетейік, "Қайтадан" композициясы 6 күн ішінде 300 мыңнан аса көрілім жинапты. Қазіргі уақытта роликті 1,4 миллион рет көрген. 

Қазақстандық поп-топ 2014 жылы құрылып, Қазақстанда ғана емес, шетелде де танымал болып үлгерді. "Айыптама" деп аталатын бірінші сингл 2015 жылдың 1 қыркүйегінде шықты. Ұжым кореялық поптың Қазақстандағы негізін қалаушысы саналады. Осы топ жаңадан Q-pop (Qazaq pop) бағытын ашып отыр. Продюсері - "Орда" тобының солисі Ерболат Беделхан. 

Топ танымалдығымен қатар қоғамда дау туғызып, қарсыластарын тауып үлгерген. Қазақстан шоу-бизнесінің бірнеше өкілі бұл жанрға, мәнерге және бағытқа қарсы болып, өткір мәлімдемелер жасаған да еді.