2025 жылдың күзінде қазақстандықтар қанша күн демалады?

Жаңа маусымға екі аптадан аса уақыт қалды. Tengrinews.kz тілшісі биылғы күз қазақстандықтардың қанша күн демалатындарын есептеді.

Қыркүйек

2025 жылы стандартты жұмыс кестесімен (5/2) еңбек ететіндер Конституция күніне орай үш күндік демалыс өткізе алады. Мереке 30 тамызда аталып өтеді, ал бұл күн сенбіге түсетіндіктен, "Мерекелер туралы" заңға сәйкес демалыс дүйсенбіге – 1 қыркүйекке ауыстырылады.

Демалыс күндерінің кестесі мынадай болады:

30, 31 тамыз және 1 қыркүйек – демалыс күндері.

Алты күндік жұмыс аптасы барлар үшін де Конституция күні қосымша демалыс әкеледі. 30 тамыз, сенбі, мерекелік демалыс күні болады. Осылайша, олар екі күн қатарынан – 30 және 31 тамызда демалады, ал 1 қыркүйек, дүйсенбі, жұмыс күні болады.

Бес күндік жұмыс аптасы барлар үшін қыркүйекте:

Барлығы 9 демалыс күні: әдеттегі сенбі мен жексенбі (8 күн) және 1 қыркүйектегі ауыстырылған демалыс (30 тамыздан). Алты күндік жұмыс аптасы барлар үшін қыркүйекте:

Демалыс тек жексенбі күндері:

7 қыркүйек
14 қыркүйек
21 қыркүйек
28 қыркүйек

Жалпы: 4 демалыс күні.

Қазан

Бес күндік жұмыс аптасы: 25 қазан (сенбі) – Республика күні. Мереке сенбіге түскендіктен, демалыс 27 қазанға (дүйсенбі) ауыстырылады. Осылайша, бес күндік кестедегілер үшін 25, 26 және 27 қазан – үш күн қатарынан демалыс болады.

2025 жылдың қазанында бес күндік жұмыс істейтіндерде 9 демалыс күні болады: айдағы барлық сенбі-жексенбі және 27 қазан (Республика күнінен ауысқан).

Алты күндік жұмыс аптасы:

25 қазан (сенбі) – мерекелік демалыс, 26 қазан (жексенбі) – әдеттегі демалыс, ал 27 қазан (дүйсенбі) – жұмыс күні. Жалпы: 5 демалыс күні (барлық жексенбі және 25 қазан).

Қараша

Бес күндік жұмыс аптасы: 2025 жылдың қарашасында 10 демалыс күні болады: айдағы барлық сенбі мен жексенбі, қосымша мерекелік не ауыстырылған күндер жоқ.

Алты күндік жұмыс аптасы: Тек жексенбі күндері демалады, жалпы саны 5 күн.

Сілтемесіз жаңалық оқисыз ба? Онда Telegram желісінде парақшамызға тіркеліңіз!